Kannan's WebLog

Lesson learnt

2004-10-11T05:02:00.000-07:00

I wanted to make this announcement in my blogspot blog, but sadly it has to happen this way.

I have moved my Tamil and English blogs to my own website http://www.kparthas.com.
English blog is hosted here: http://blog.kparthas.com
Tamil blog is hosted here: http://tamil.kparthas.com (Tamil blog hasn't been setup properly yet).

Coming to the sad part, in the process of backing up my blog entries from my blogspot accounts (viz., kadalai.blogspot.com and www-kannan.blogspot.com) I had to setup the publish preferences of those blogs to FTP from blogspot hosting. The backup process went up smooth and the blog entries now are accessible under similar subdomains under kparthas.com but I didn't knew that my hold over the subdomains in blogspot would be released if i changed my publish option. And lo, blogger freed up my subdomains for fresh allocation.

Before I could recognize, my subdomain http://kadalai.blogspot.com was gone and I have lost all the connection I had with that name for the past one year.

And a new lesson has been learnt.

So if you were looking for my blog, you will have to come to the above mentioned domain, additionally the backup I had taken can be found here: http://kadalai.kparthas.com.

கண்ணன் வந்தான்

2004-09-06T09:31:00.000-07:00

இன்று கோகுலாஷ்டமி, சிறு வயதில் தீபாவளிக்கு அடுத்ததாக நான் எதிர்பார்த்துக் காத்திருக்கும் பண்டிகை. நவணீதம், வெல்ல சீடை, உப்புச் சீடை, முறுக்கு, அப்பம், வடை, பாயசம் என்று காரணங்களை அடுக்கிக்கொண்டே போகலாமே. இம்முறையும் சற்றே அதிக எதிபார்ப்புடன் இருந்தது, பின்னே கடந்த மூன்று வருடங்களாக பெங்களூரில் தனியாக இருந்ததால் கிருஷ்ண ஜெயந்தி மற்ற சாதாரண நாட்களில் ஒன்றாக கழிந்தது, இவ்வருடம் அம்மா அப்பா இங்கு பெங்களூரிலேயே இருப்பதால் நிச்சயம் சிறப்பாக இருக்கும் என்ற நம்பிக்கைதான்.
நான் எதிர்பார்த்ததைவிட கோகுலாஷ்டமி மிகச் சிறப்பாக இருந்தது.
சில படங்கள்.

குழந்தைக் கண்ணின் திருவடித் தடங்கள்

நொறுக்குத் தீணிகள் :-)

இழைக் கோலம்

இரங்கல்

2004-08-11T06:57:00.000-07:00

திரு ஃபிரெட்ஹம் ஹார்டி, ஆகஸ்டு 4ம் தேதி தமது 61ம் வயதில் இயற்கை எய்தினார்.
அவருடைய நட்பு, அவருடன் நடந்‌த உரையாடல்கள் என்றென்றும் மறக்க முடியாதவை.

மிகவும் வருத்தத்துடன்
கண்ணன்

சுட்டிகள்:
ஃபிரெட்ஹம் ஹார்டியுடன் உரையாடல். (வலைப்பூ)

ஃபிரெட்ஹம் ஹார்டி எழுதிய புத்தகங்கள்

1. The religious culture of India
2. Viraha Bhakti

சேது

2004-07-25T22:13:00.001-07:00

சேதுவுக்கு வரும் எல்லோரும் பாவங்களைக் கழுவிக்கொண்டிருக்க அதனால் தனக்குப் புண்ணியம் உண்டா என்று கடல் நீரைக் களைந்‌து பார்க்கிறார்.

2004-07-25T22:13:00.000-07:00

2004-07-22T06:22:00.000-07:00

கேக்கரை கோவிலிலுள்ள சீதை விக்கிரகத்தின் சிறப்பம்சம் சீதையின் கொண்டையிலுள்ள சூரிய பிரபை மற்றும் சந்திர பிரபை, இது மற்ற விக்கிரகங்களில் அரிதாகவே காணப்படுகிறது.

2004-07-22T05:35:00.001-07:00

உற்சவ மூர்த்திகள்

2004-07-22T05:35:00.000-07:00

கோவிலின் மேலுள்ள இராமர், இலட்சுமணர், சீதை.

2004-07-22T05:34:00.000-07:00

கேக்கரை கோவில் முகப்பு

2004-07-22T05:33:00.000-07:00

கேக்கரை (கயா கரை) கோவில். இராமர் சீதையைத் தேடி தென்னாட்டுப்பக்கம் வந்த பொழுது இவ்வூரில் தசரதருக்கு திவசம் செய்ததாக கூறப்படுகிறது. அதனால் இது தென்னக கய (கயாக் கரை) என்றும் அழைக்கப்படுகிறது. (திருவாரூரில் ஓடும் ஆற்றிற்கு "ஓடம் போக்கி" என்று பெயர், இராமரின் ஓடம் இவ்வழியே சென்றதால் இப்பெயர் வந்ததென்பர்).

திருவாரூர் விஜயம்

2004-07-01T05:05:00.000-07:00

அப்பா அம்மாவை பெங்களூருக்கு குடிபெயர்த்து ஒரு மாதமாகிவிட்ட பிறகு சென்றவாரம் திருவாரூரிலிருந்‌து மூன்று கிலோமீட்டர் தொலைவில் இருக்கும் "கேக்கரை" என்ற கிராமத்திலுள்ள இராமர் கோவில் கும்பாபிஷேகத்திற்காக திருவாரூர் செல்ல வேண்டியிருந்‌தது. இம்முறை பயணத்திலிருந்‌த வித்தியாசத்தை ஆரம்பத்திலேயே உணர முடிந்‌தது. இதுநாள்வரை திருவாரூர்ப் பயணத்திற்கு அப்பா அம்மாவைக் காணவேண்டும் என்பதுதான் காரணமாக இருக்கும் ஆனால் முதல் முறையாக திருவாரூரைக் காணவேண்டும் என்பதற்காக பயணித்தோம். அப்பொழுது சுற்றுலா செல்லுவது போல ஒரு அந்‌நியத்தன்மை ஏற்பட்டதை தவிர்க்க முடியவில்லை.

பெங்களூரிலிருந்‌து வெள்ளிக்கிழமை மாலை தஞ்சாவூர் எக்ஸ்பிரஸில் கிளம்பி சனிக்கிழமை காலை ஆறரை மணிக்கு தஞ்சாவூர் வந்‌தடைந்தோம். ரயில் நிலையத்தில் இறங்கியவுடன் "திருவாரூர், நாகப்பட்டிணம் வழியாக நாகூர் வரை செல்லும் நாகூர் பாஸஞ்சர் இரண்டாவது ப்ளாட்பாரத்திலிருந்‌து புறப்படத் தயாராகவுள்ளது" என்ற அறிவிப்பு காதில் விழுந்‌தது. உடனே மூச்சிறைக்க டிக்கெட் கவுண்டர் வரை ஓடி எனது காலை உடற்பயிற்சியை முடித்துக்கொண்டேன். டிக்கெட் வாங்கி வண்டியில் நெருக்கியடித்து ஏறுவதற்கும் வண்டி புறப்படுவதற்கும் சரியாக இருந்‌தது. அப்பொழுது பெங்களூரிலிருந்‌து என்னோடு வந்‌த என்னுடைய சக பயணி ஒருவர் ரயிலில் மூச்சிறைக்க நின்றுகொண்டிருந்‌த என்னைப்பார்த்து "இவ்வளவு வேகமாக ஓடி டிக்கெட் வாங்கியிருக்க வேண்டியதில்லை, நான் டிடியி யிடம் சொல்லி அவரிடமே டிக்கெட் வாங்கிவிட்டேன்" என்று சொல்லி எனது வயிற்றெரிச்சலை சம்பாதித்துக் கொண்டார்.

ரயிலில் நெரிசல் நிறைய இருந்தாலும் அம்மா அப்பாவிற்கு ஓரிடத்தில் உட்கார வசதி கிடைத்தது. அப்பா என்னையும் உட்கார வைக்கப் பிரம்மப் பிரயத்தனப் பட்டு அது நடக்காததால் சும்மா விட்டுவிட்டார். நான் ரயிலில் எனது ஆஸ்தான இடமான கதவுப் பகுதியில் நின்றுகொண்டேன். எது எவ்வளவு மாறியிருந்‌தாலும் தஞ்சாவூரிலிருந்‌து திருவாரூருக்கான ரயில் பயணம் மட்டும் மாறவில்லை என்பதை உணர அதிக நேரம் பிடிக்கவில்லை. தஞ்சாவூரிலிருந்து திருவாரூருக்கு ரயிலிலோ அல்லது பேருந்திலோ பயணம் செய்ய பாக்கியம் கிட்டாதவற்களுக்கு, பச்சை வயல்வெளியிலும் பாம்பு போல பயணம் முழுவதிலும் குறுக்கே நெளிந்து வரும் ஆற்றின் ஓரத்திலும் செல்லும் பயணத்தை வார்த்தையில் விவரித்தால் நன்றாக இராது அதனை அனுபவிக்க வேண்டும்.

திருவாரூருக்கு செல்லும் வழியில் வயல்வெளி, ரயிலிலிருந்‌து எடுத்தது

திருவாரூர் வந்தடைந்த பொழுது மணி சரியாக ஒன்பது. ரயில் நிலையத்திலிருந்து வீட்டிற்கு பத்து நிமிட நடை, வீட்டை அடைந்ததும்தான் ஒருவித நிம்மதி ஏற்ப்பட்டது. திருவாரூருக்கு எப்பொழுது சென்றாலும் நேரத்தை வீட்டிலேயே செலவிட விரும்புவேன். ஆனால் இம்முறை வெளியே செல்லவேண்டும் என்று தோன்றியது. குளித்து முடித்ததும் சைக்கிளை எடுத்துக்கொண்டு வெளியே கிளம்பினேன். ஊரிலுள்ள இடங்கள் அனைத்தும் ஆங்காங்கே இருக்கிறதா என்று சோதனைப் போடுவதைப்போல ரயில் நிலையம், பஸ் நிலையம், கமலாலயம் என்று சுற்ற ஆரம்பித்தேன். சரியாகப் பனிரெண்டு மணிக்கு பசி வயிற்றைக் கிள்ளியதும் வீட்டிற்குத் திரும்பினேன். சனிக்கிழமையின் மிச்சம் டிவியின் முன்பும் என்னுடைய புத்தக அலமாரியைக் குடைந்ததிலும் போயிற்று.

திருவாரூர் சென்றால் காலை எழுந்திருக்கும் நேரம் என்னிஷ்டத்தைப் பொறுத்தது என்பதால் இரவு பனிரெண்டு மணிக்கு அப்பாலும் டிவி பார்ப்பது என் வழக்கம். 1991ம் ஆண்டு வாங்கிய எங்களது தொலைக்காட்சியில் பத்து சானல்களுக்குமேல் தெரியாதென்பதால் எப்பொழுதும் ஏதாவது தமிழ் தொலைக்காட்சியைப் பார்ப்பது வழக்கம். ஆனால் இம்முறை சித்தப்பா தான் பார்பதற்காக வேறொரு டிவியை பொறுத்தியிருந்தார். கையில் ரிமோட்டை வைத்துக்கொண்டு சானலை அலசியதில் "ஐயாம் சாம்" (Ian Sam) என்ற திரைப்படனம் கண்ணில் பட்டது. அதன் பிறகு ரிமோட்டைக் கையில் எடுக்க மனமில்லை. மனநிலை பாதிக்கப்பட்ட சாம் என்ற ஒரு முப்பது வயது "சிறுவனுக்கும்" அவனது பெண்னிற்கும் இடையே நிகழும் சம்பவங்களை மிகவும் உணர்ச்சிப்பூர்வமாக கண்முன்னே கொண்டுவந்து நிறுத்தியிருந்தார் படத்தின் இயக்குனர் ஜெஸ்ஸி நெல்சன்.

படத்தில் மனநிலை சரியில்லாத"சாம்"மாகவே வாழ்ந்திருந்தார் "சேன் பென்" (Sean Penn). மிசெல் ஃபீபரும், படத்தில் சாம்மின் பெண்ணாக நடித்திருந்த டாகோடா ஃபான்னிங்கும் மனதில் ஆழமாகப் பதிந்துவிட்டார்கள். என்னை ஆழமாக ஈர்த்த மிகச் சில படங்களில் இதுவும் ஒன்றாகியது. படத்தின் முடிவு சுபமானதாக இருந்த பொழுதும் படம் முடிந்ததும் மனதில் மிகுந்த பாரம் தங்கிவிட்டது.

படம் முடியும் பொழுது மணி ஒன்று. பெங்களூருக்கு திங்கட்கிழமையே திரும்பவேண்டிய நிர்பந்தத்தில் இருந்ததால் புதன் கிழமை நடக்கவிருந்த கேக்கரை இராமர் கோவில் கும்பாபிடஷேகத்திற்கு செல்ல இயலாது, ஞாயிற்றுக் கிழமை முதல் வேளையாக கோவிலுக்குச் சென்றுவிடுவது என்ற நிணைப்போடு தூங்குவதற்குச் சென்றேன்.

நீண்ட நாட்களுக்கு பிறகு மறுபடியும்....

2004-06-29T03:09:00.000-07:00

ஒரு மாதத்திற்கு மேலாகிவிட்டது, இந்தப் பக்கம் வந்து.
வராமலிருந்ததற்கு (என்னுடைய சோம்பேரித்தனத்தைத் தவிர வேறொரு) காரணமிருகிறது. நான் என்னுடைய பெங்களூர் வாசத்தின் அடுத்த நிலையை அடைந்ததுதான் அது.

இதுநாள் வரை திருவாரூரில் நிம்மதியாக இருந்த எனது அம்மா, அப்பாவை பெங்களூர் அழைத்து வந்துவிட்டேன். மிக நீண்டநாளாக திட்டமிட்டது இப்பொழுதுதான் நடந்‌து முடிந்திருக்கிறது. அம்மாவையும் அப்பாவையும் திருவாரூரிலிருந்து இடம் பெயர்க்கிறேன் என்ற வருத்தம் இருந்தாலும் அவர்கள் முன்னூறு மைல்களுக்கு அப்பாலில்லாமல் என்னுடனே இருப்பார்கள் என்பதனால் ஒருவித சந்தோஷமே மேலோங்கி இருக்கிறது. அவர்களுக்கும் பத்து வருடங்களுக்குப் பின் மகனுடன் சேர்ந்து இருப்பது மகிழ்ச்சியாகவே இருக்கிறது.

இதுவரை அடிக்கடி நடந்த திருவாரூர் விஜயம் இனி கொஞ்சம் கொஞ்சமாகக் குறைந்துவிடும் - இது ஒரு பெரிய இடியாகவே இருக்கிறது.

என்ன செய்வது மாற்றங்கள் இயற்கைதானே

வாரயிறுதிப் பயணங்கள் - செட்டிநாடு 2

2004-06-28T02:03:00.000-07:00

Panoramic view of a Chettinad house (click on the picture to enlarge).

வாரயிறுதிப் பயணங்கள் - செட்டிநாடு

2004-05-28T04:48:00.000-07:00

சென்ற வார இறுதியில் எனது கல்லூரித் தோழனது திருமணத்திற்காக செட்டிநாட்டுப்பக்கம் சென்றேன். செட்டிநாடு என்பது தனியே ஒரு ஊர் இல்லை (என்றுதான் நிணைக்கிறேன்), புதுக்கோட்டை, சிவகக்ங்கை மற்றும் அதனைச் சார்ந்த பகுதிகள்தாம் செட்டிநாடு. செட்டிநாடு முழுவதிலும் கிராமங்களை பட்டி என்றே அழைக்கிறார்கள், இதற்கு சில விதிவிலக்கும் உண்டு, அவ்வாரொன்றுதான் "குழிபிறை, எனது நன்பனுடைய ஊர். (அது என்ன குழிபிறை? உச்சரிக்கும் பொழுது குழிப்பிறை என்றே வருகிறது).

திருமணத்திற்கு கிளம்பும் முன்னரே அங்கு என்னவெல்லாம் பார்க்க வேண்டும் என்று முடிவு செய்துகொண்டேன்.
"நீ அங்கே எல்லாம் பார்கணும்னு சொல்லரே சரி, ஆனால் அங்கே இருக்கும் வெயிலில் என்ன நடக்கிறது என்று பார்க்கிறேன்", கிளம்பும் முன்னரே நன்பன் ஆரூடம் சொல்ல ஆரம்பித்தான், அவன் பேச்சை ஒதுக்கிவிட்டு திருமயம் கோட்டைக்கு செல்லவேண்டும் என்று முடிவு செய்தேன். சென்ற மாதமும் திருமயத்திற்கு சென்றிருந்தேன் ஆனால் அங்கு கோட்டைக்கு செல்ல முடியவில்லை.திருமயம் கோவிலை மட்டும் தரிசிக்க முடிந்தது.

திருமயம் பெருமாள் கோவில்

திட்டமிட்டபடி வெள்ளிக் கிழமை இரவு பெங்களூரிலிருந்து கிளம்பி திருச்சி வழியாக புதுக்கோட்டையை சனிக்கிழமை காலை அடைந்தேன். நன்பன் எனக்காக ஏற்பாடு செய்திருந்த காரை வேண்டாமென்று சொல்லிவிட்டு ஆறாம் நம்பர் டவுன் பஸ்ஸை பிடித்து குழிபிறைக்குப் பயணித்தேன். புதுக்கோட்டையிலிருந்து பொன்னமராவதி செல்லும் வழியில் இருக்கிறது குழிபிறை. அந்த ஊருகு குழிபிறை என்று ஏன் பெயர் வந்தது என் பது பயணத்தின் போதுதான் புரிந்தது. சாலை என்று குறிப்பிட்டு சொல்லும்படியாக் ஏதுமின்றி ஒரே குண்டும் குழியுமாக இருந்த வழியாக இருபது கிலோமேட்டர் பயணம். சில இடங்களில் இது தான் சாலை என்பதை அகழ்வாராய்ச்சி செய்து கண்டுபிடிக்குமளவிற்கு இருந்தது. பேருந்து ஓட்டுனர் தான் சளைத்தவரில்லை என்று நிரூபிக்க பெரும் பிரயத்தனப் பட்டு அதில் வெற்றியும் கண்டுவிட்டார். ஒரு மணிநேரம் பயணத்திற்குப் பிறகு குழிபிறையை அடைந்தேன்.

அதுவரை எங்கோ ஒளிந்துக்கொண்டிருந்த சூரியனார் திடீரென்று என் மீது அதீத பாசம் கொண்டுவிட்டார், அவரது முழு பார்வையும் என் மீதே விழும்படியாகப்பார்த்துக் கொண்டார். குழிபிறையில் மொத்தம் ஐந்தாறு தெருக்களே இருந்தது, எனது நண்பனுடைய வீட்டினை அடைய பத்து தெருக்கள் நடந்தது போன்றதொரு உணர்வு ஏற்ப்பட்டது. நல்ல வேளையாக "பஸ் ஸ்டாப்பில் இறங்கி யாரிடம் வழி கேட்டாலும் சொல்வார்கள்" என்று சொன்ன நண்பன் அப்பொழுது அங்கு இல்லை.

மின்னஞ்சல் பதிவு - சோதனை

2004-05-12T02:19:00.000-07:00

ரொம்ப நாட்களாக ப்ளாகரில் நான் எதிர்பார்த்துக்கொண்டிருந்த சில புதிய அம்சங்கள் இப்பொழுது
வெளிவந்துள்ளன. மறுமொழிகள் அவற்றுள் ஒன்று என்றாலும், மின் அஞ்சல் மூலம் பதிவது
இன்னொன்றாகும். இதற்கு நாம் செய்யவேண்டியது எல்லாம், பதிவுகளின் "settings"ல் சென்று
மின்னஞ்சல் என்ற பகுதியில் ஒரு புதிய மின்னஞ்சலை ஏற்ப்படுத்தவேண்டியது தான் (மின்னஞ்சல்
முகவரியில் பாதி உங்கள் பெயரும் மீதி ஒரு தரவுச்சொல்லுமாக இருத்தல் அவசியம்). பிறகு
இம்மின்னஞ்சல் முகவரிக்கு அனுப்பும் அஞ்சல்கள் எல்லாம் உங்கள் வலைப்பதிவில்
பதிக்கப்பட்டுவிடும். பிறகு அந்த மின்னஞ்சல் முகவரியை யாருக்கும் தெரியாமல்
வைத்திருக்கவேண்டும், இல்லையெனில் யாரோ அனுப்பும் அஞ்சல்கள் உங்கள் பதிவில் வெளியாகிவிடும்.

இப்பொழுது நீங்கள் படித்துக்கொண்டிருக்கும் பதிவு மின்னஞ்சல் மூலம் அனுப்பியதே.

அன்புடன்
கண்ணன்

ஒருவழியாக

2004-05-12T01:40:00.000-07:00

அப்பாடா! ஒரு வழியாக இந்த ப்ளாகர் டெம்ப்ளேட்டை சரி செய்துவிட்டேன். சும்மா இருந்த என்னை ப்ளாகரின் புதிதாக அறிமுகப்படுத்தப்பட்ட மறுமொழி வசதி தூண்டியது (மறுமொழியின் நீளத்திற்கு எல்லை கிடையாதாமே). டெம்ப்ளேட்டில் கைவைத்தவுடன் அலாவுதீனின் பூதம் போல அதிலிருந்த குளருபடிகள் வெளிவந்தன, அதனை சரி செய்வதற்கே இவ்வளவு நேரம் பிடித்தது. மறுபடியும் பழைய பதிவு போல வந்துவிட்டெதென்று நிணைக்கிறேன்.

வாரயிறுதிப் பயணங்கள்

2004-05-04T21:38:00.000-07:00

இப்பொழுதெல்லாம் ஒவ்வொரு வார இறுதியிலும் எங்காவது செல்ல வேண்டியிருக்கிறது. கடந்த பத்து வாரங்களாக நான் வார இறுதிகளில் பெங்களூரில் இருக்கவில்லை. ஒவ்வொரு வார இறுதிப் பயணமும் ஏதாவது ஒரு வகையில் மிகவும் சுவாரசியமாக அமைந்து விடுகின்றது. சென்றவார இறுதியில் திருவாரூர் சென்றிருந்தேன், பெயருக்குத்தான் அது திருவாரூர் பயணம் ஆனால் திருவாரூரில் சனிக்கிழமை இரவு மட்டும் தான் தங்கினேன் மற்ற அனைத்து நேரமும் ஒரே க்ஷேத்ராடனம்தான்(அப்பாடா, சரியாக எழுதிவிட்டேன்). சனிக்கிழமை இரவு ஒப்பிலியப்பன்கோவிலுக்குச் சென்றோம். கோவில்களில் ஒப்பிலியப்பன் கோவிலுக்கு எப்பொழுது ஒரு தனியிடம் உண்டு. திருப்பதியில் அரைமணிநேரம் "ஜருகண்டி ஜருகண்டி" ஏதும் இல்லாமல் ஸ்வாமி தரிசனம் கிடைத்தது போன்ற ஒரு உணர்வு ஒப்பிலியப்பன் கோவிலில் ஏற்படும்.

ஞாயிற்றுக்கிழமை எனது தாத்தாவின் பூர்வீகத்திற்கு அருகிலுள்ள "குறிச்சி" என்ற கிராமத்திற்குச் சென்றிருந்தேன். மன்னார்குடியிலிருந்து சுமார் 15 கிலோமீட்டர் தொலைவிலிருக்கும் குறிச்சி கிராமத்தின் மொத்த ஜனத்தொகை 800 நபர்களேயாகும். அக்கிராமத்திலுள்ள ஒரு பெருமாள் கோவிலின் புணரமைப்பிற்காக நடந்த "பாலாலயத்திற்கு" சென்றிருந்தேன். கோவிலின் புணரமைப்பு தொடங்குவதற்கு முன்னர் விக்கிரகங்களை அகற்றி வேறொரு இடத்தில் ஏளச்செய்யும் (ஏள = எழுந்தருள வின் பேச்சு வழக்குச் சொல்) சடங்கிற்குப்ப் பெயர்தான் பாலாலயம். அக்கோவிலில் மூலவராக "அபீஷ்ட வரதன்" பெருமாளும் தாயாராக "பெருந்தேவித்தயாரும்" ஏளியிருந்தார்கள். கோவில் புணரமைப்பிற்காக வந்திருந்த ஸ்தபதி அவ்விரு விக்கிரகங்களும் 700 ஆண்டுகளுக்கு முந்தையது என்று மதிப்பிட்டார்.

அபீஷ்ட வரதர்

பெருந்தேவி தாயார்

பாலாலயம் விழா ஒரு சிறு கும்பாபிஷேகம் போல இருக்கும், உண்மையில் இது கும்பாபிஷேகத்திற்கு ஒரு முன்னோடியே. கிராம மக்களின் முகங்களில் ஆச்சரியத்தையும் ஆர்வத்தையும் பார்க்க முடிந்தது. யாருமே பல வருடங்களாகச் சீந்தாத ஒரு பாழடைந்த கோவிலுக்கு நாங்கள் (அதுவும் சுமோவிலும் காரிலுமாக) வந்தது ஆச்சரியமாகத்தானே இருக்கும். கோவிலின் பாலாலயம் மிகச்சிறப்பாக நடைபெற்றது. பிறகுதான் விக்கிரகங்களை இடம்மாற்றும் நிகழ்ச்சிநடந்தது, இதுவரை ஏதோ கதை பேசிக்கொண்டிருந்த கிராம அதிகாரியின் முகத்தில் திடீரென்று ஒரே பரபரப்பு காணப்பட்டது, கோவிலுக்குள்ளிருக்கும் விக்கிரகங்களை அகற்றும் பணியை கிராம அதிகாரி மேற்பார்வையிட வேண்டும் என்றாலும் அவரது முகத்தில் இருந்த பரபரப்பு தேவையை விட சற்றே அதிகமாக இருந்ததாகப் பட்டது. இதற்காண காரணம் வெகு விரைவிலேயே புரிந்தது. எந்தவொரு கோவிலிலும் விக்கிரகங்களை நிறுவுவதற்கு முன்னர் விக்கிரகத்திற்கு அடிக்கல்லாக சில மூலிகைகளையும்(மருந்து) தங்கம், வெள்ளி, வைரம் மற்றும் நவரத்தினங்களையும் வைப்பது வழக்கம். அவ்வாறு இக்கோவிலில் உள்ள புதையலை(?)ப் பார்ப்பதற்குத்தான் இவ்வளவு பரபரப்பு.

விக்கிரகங்கள் அப்புரப்படுத்தப்பட்டவுடன் ஒரு சிறு கும்பலே அவ்விடத்தை முற்றுகையிட்டது, அங்கிருந்த மணல் முதலியவற்றைச் சேகரித்து அதில் துழாவ ஆரம்பித்தார்கள். ஆனால் அவர்களுக்கு ஏமாற்றமே மிஞ்சியது, புதையல் ஏதும் கிட்டவில்லை. ஆனால் நானோ ஒரு பெரிய புதையலைப் பார்த்தேன், விக்கிரகங்களின் கீழிருந்த அக்காலக் காசுகள் தான் அது. அதனைச் சேகரித்தவர் அது தங்கக் காசுகள் என்ற நிணைப்போடரதனைச் சுரண்ட ஆரம்பித்தார், பின்னர் அதனை தரையிலும் போட்டு தேய்க்க ஆரம்பித்தார். மிகவும் போராடி அக்காசுகளை அவரிடமிருந்து மீட்டேன். அவற்றை ஆராய்ந்த பொழுது அவை பிரிட்டிஷ் இந்தியாவின் நாணயங்கள் எனத்தெரிந்தன. குறைந்த பட்சம் அறுபது வருடங்களுக்கும் மேலாகிவிட்டதால் நாணயங்கள் பச்சை நிறத்துடன் காணப்பட்டன. ஒரே ஒரு நாணயத்தில் மட்டும் அது 1942ம் வருடத்தைய அரை ரூபாய் நாணயம் என்று கண்டுபிடிக்குமளவிற்கு பச்சை நிறம் குறைந்திருந்தது.மற்ற நாணயங்களை அவற்றின் உருவத்தை வைத்து இரண்டு மற்றும் ஓரணாக்கள் என்று கண்டுபிடிக்க முடிந்தது. அக்காலத்தில் வெளிவந்த கால், அரை மற்றும் ஒரு ரூபாய் நாணயங்கள் வெள்ளியினாலானது, அதனை நான் அங்கே சொல்லியிருந்தால் அந்நாணயங்கள் யாருடைய பையிற்கோ சென்றிருக்கும், எல்லா நாணயங்களும் பித்தளையிலானது என்று சொல்லிவிட்டு அவற்றை ஒரு புகைப்படமும் எடுத்துக்கொண்டேன். பிறகு அந்நாணயங்கள் கிராம அதிகாரியிடம் ஒப்படைக்கப்பட்டது. அந்நாணயங்களை அவர்கள் தூர எறியவோ, அல்லது வேறொருவருக்கு கொடுக்கவோமாட்டார்கள் என்ற உறுதியைப் பெற்றுக் கொண்டபிறகே அவ்விடத்தைவிட்டு நகர்ந்தேன்.

கோவிலிலிருந்த நாணயங்கள்

திருவாரூர் தேர், சில படங்கள்

2004-05-02T23:52:00.000-07:00

மழைமேகங்கள் பின்னனியில் திருவாரூர் தேர்

தியாகராஜர் தேர் (பின்னாலிருப்பது).

வானுயரத் தேர்

பிரம்மா நான்கு குதிரைகளையும், யாழியையும் பூட்டி தேரோட்டும் காட்சி

நளபாகம் - 2

2004-05-01T07:44:00.000-07:00

I wanted to publish this in Valaippoo, but I couldn't do much with this damned 56kbps connection serving 8 computers (also called browsing center in tiruvarur). Luckily I had typed this as a draft in blogger, So I'm just releasing this (means I'm not responsible for missing characters and spelling mistakes, would try to re-edit this on monday though).

---------------------

நளபாகம் - 2

என்னுடைய நளபாக உத்திகளை எனது பதிவில்தான் வெளியிடுவதாக இருந்தேன், ஆனால்
அதற்குள் ஒரு ஞாயிற்றுக்கிழமை உருண்டோடிவிடும் என்பதால் இங்கேயே
வெளியிடுகிறேன்.

"பாஸ்தா ப்ராவாஸ்" எப்படி செய்வதென்று பார்ப்போம்.

பாஸ்தா ப்ராவாஸ்(©கண்ணன்)

என்னடா இது பெயரே குழப்பமாக இருக்கிறதே என்று பார்க்கிறீர்களா? இத்தாலிய பாஸ்தாவை நம் தமிழ் நாக்கிற்கு (நாடு இல்லீங்க நாக்குதான்) ஏற்றவாறு செய்தால் வருவதுதான் "பாஸ்தா ப்ராவாஸ்". பெயருடன் ஏன் ஸ்பானிஷ்
வார்த்தையான ப்ராவாஸ் ஒட்டிக்கொண்டிருக்கிறது என்று நிணைப்பவர்களுக்கு, ப்ராவாஸ்(bravas) என்றால் "Fierce"(இங்கு காரம்) என்று அர்த்தம் (தமிழில் அவரவ்ருக்கேற்றவாறு புரிந்துகொள்ளலாம், எனது முந்தைய பதிவைப் படித்தவர்கள் "brave" அல்லது "தைரியமான" என்ற அர்தங்கொள்ளவும்).

தேவையான பொருட்கள்:

மேக்கரோனி (macaroni) - 1 பாக்கெட்
நறுக்கிய காய்கறிகள் (கேரட், பீன்ஸ், உருளைக்கிழங்கு) - 1 கப்
உப்பு - தேவையான அளவு
சமையல் என்ணை - தேவையான அளவு
மிளகாய்ப் பொடி - சிறிதளவு
கடுகு, வெள்ளை உளுத்தம் பருப்பு
அவ்வளவுதான்.

முதலில் ஒரு பாத்திரத்தில்(குக்கர் கூடாது) நீரூற்றி சிறிதளவு உப்பை போட்டு, பின்னர் மேக்கரோனியை சேர்த்து வேகவைக்கவும் (பத்து நிமிடங்கள் ஆகலாம்). அதே சமயத்தில் நறுக்கிய காய்கறிகளையும் தனியே வேகவைக்கவும்
(இதற்கு குக்கர் உபயோகப்படுத்தலாம்).
இரண்டு வேகவைத்தலும் முடிந்தபின்னர், அவற்றிலிருக்கும் தண்ணீரை வடிகட்டவும். (மறக்காமல் அடுப்பைப் பற்றவைத்த பிறகு)ஒரு வானலியில் சிறிதளவு சமையல் என்ணையை விட்டு அதில் வைக்கவும். என்ணை சிறிது
சூடானவுடன் கடுகு, வெள்ளை உளுத்தம்பருப்பு போன்றவற்றைப்போட்டு வறுக்கவும் (கறிவேப்பிலையையும் சேர்த்துக்கொள்ளலாம்). பிறகு வானலியில் இருக்கும் கடுகு-உளுத்த்ம்பருப்புடன் வேகவைத்த காய்கறிகளைச் சேர்க்கவும். தேவையான அளவு உப்பு, மிளகாய்ப்பொடி போன்றவற்றை இப்பொழுது சேர்த்துக்கொள்வும். மசால வாசம் பிடித்தவர்கள் சிறிது மசாலா பொடியையும் சேர்த்துக் கொள்ளலாம் (மசாலாவிற்கு எங்கே போவது
என்பவர்களுக்கு, MAGGI பொன்ற நூடுல்ஸ் பாக்கெட்டுடன் வரும் மசாலாவைப் பயன்படுத்துங்கள்). சிறிது நேரம் (1 நிமிடம்) கழித்து வேகவைத்த மேகரோனியைச் சேர்க்கவும். இப்பொழுது வானலியிலுள்ளவற்றை சிறிது நேரம்
கிளறிவிட்டு பின் இறக்கிவிடவும்.

அவ்வளவுதான் பதினைந்து நிமிடங்களுக்குள்ளாகவே பாஸ்தா ப்ராவாஸ் தயார்.

வலைப்பூ வாசம்

2004-04-26T08:45:00.000-07:00

மொட்டுகளிலேயே இருக்கும் எனக்கு(ம்) வலைப்பூவில் ஒரு வாரகாலம் வாசம் செய்யும் வாய்ப்பு கிட்டியிருக்கிறது.

நாணயங்கள் - 3, தபால்தலைகள் - 2

2004-04-21T02:34:00.000-07:00

திருவாங்கூர் சமஸ்தானம் (தற்பொழுது கேரளா) ஒரு காலத்தில் மிகவும் வல்லமை படைத்த, செழிப்பானதொரு அரசாக விளங்கியது. பிரிட்டிஷ் இந்தியாவிலும் நெடுநாள்வரை திருவாங்கூர் சமஸ்தானத்தில் அவர்களது தபால்தலைகளும் நாணயங்களுமே புழக்கத்திலிருந்தன.
திருவாங்கூர் நாணயங்களில் மகாவிஷ்ணுவின் உருவங்களே (அல்லது விஷ்ணுவின் அடையாளங்கள்) அதிக அளவில் இருக்கும். கடைக்கால திருவாங்கூர் நாணயங்களில் மட்டும் ஆங்கிலேயரின் தாக்கத்தைப் பார்க்கலாம், மன்னரின் உருவம் மேலை நாட்டு உடையலங்காரத்தில் பொறிக்கப்பட்டிருக்கும். திருவாங்கூர் நாணயங்களின் மதிப்பு பொதுவாக "காசு"களாலும் "சக்கரங்களா"லும் குறிக்கப்படும்.
கீழிருப்பது எனது நாணய சேகரிப்பிலுள்ள ஒரு திருவாங்கூர் நாணயம்.

காலம்: 19ம் நூற்றாண்டு

மதிப்பு: ஒரு காசு

விளக்கம்:
முன்புறம்: மகாவிஷ்ணுவின் சின்னமான சங்கு

பின்புறம்: "ஒரு காசு" என்ற மலையாள வார்த்தைகள்.

திருவாங்கூர் நாணயம் மட்டுமல்லாது தபால் தலைகளும் அழகான(நேர்த்தியான)வை. திருவாங்கூர் சமஸ்த்தானத்தில் முதன் முதலில் 1888ம் ஆண்டு தபால்தலைகள் அறிமுகப்படுத்தப்பட்டன. பின்னர் இந்த தபால்தலைகள் 1953ம் ஆண்டுவரை புழக்கத்திலிருந்தன. அவ்வாறு புழக்கத்திலிருந்த தபால்தலைகளில் ஒன்று என்னிடம்.

சில சுட்டிகள்:
1. திருவாங்கூர் நாணயங்கள்
2. திருவாங்கூர் தபால்தலைகளின் நூற்றாண்டு விழாவைக் குறிக்கும் வகையில் வெளியான இந்தியத் தபால் தலை(கள்)

அக்னிப் பரீட்சை

2004-04-21T01:27:00.000-07:00

சமீபத்தில் திருவாரூர் சென்றிருந்த பொழுது அங்கு(ம்) ஒரு இன்டெர்நெட் மையத்தில் (அட அமாங்க, திருவாரூரிலும் இண்டெர்நெட் மையங்கள் இருக்கின்றன) எனது வலைப்பதிவை விண்டோஸ் 98 இயங்குதளத்தில் பார்க்க நேரிட்டது. எனது வலைத்தளம் உலாவிகளின் அக்னிப்பரீட்சையில் தேரிவிட்டது என்றே தோன்றுகிறது.
பல்வேறு உலாவிகளில் எனது வலைப்பதிவு பற்றிய ஒரு பட்டியல்

இயங்குதளம்	ஊலாவி	வலைப்பதிவின் நேர்த்தி
விண்டோஸ் 2000	மொஸில்லா ஃபயர் ஃபாக்ஸ்
வின்டோஸ் 2000	இண்டெர்நெட் எக்ஸ்புளோரர்
விண்டோஸ் 98	மொஸில்லா ஃபயர் ஃபாக்ஸ்	(மொஸில்லா வாழ்க!!)
விண்டோஸ் 98	இண்டெர்நெட் எக்ஸ்புளோரர்	(முரசு அஞ்சல் கணினியில் இயங்கிக்கொண்டிருக்க வேண்டும்)

(இன்னமும் மேக்கிண்டோஷ், லினக்ஸ் இயங்குத்தளங்களில் சோதனை செய்யவேண்டும்.)

இவை அனைத்தையும் விட எனக்கு மிகவும் ஆச்சரியத்தையும் மகிழ்ச்சியையும் கொடுத்த விஷயம், அந்த வலை மையத்திலுள்ள அனைத்து கணினியிலும் மொஸில்லா உலாவி நிறுவப்பட்டிருந்தது தான் (ஒரு விண்டோஸ் 2000 கணினியில் தமிழா உலாவியும் இருந்தத்து).
ஆகவே வலைப்பதிவாளர்களே உங்கள் வலைப்பதிவை மொஸில்லா உலாவிகளிலும் செயல்பட வைக்குமாறு கேட்டுக்கொள்கிறேன்.

சில சுட்டிகள்
1. http://groups.yahoo.com/group/tamilblogs/message/776
2. http://groups.yahoo.com/group/tamilblogs/message/777
3. தமிழ் வலைப்பதிவுகள் விக்கி(wiki)

தபால் தலைகள் - 1

2004-04-17T00:31:00.000-07:00

தபால் தலைகள் சேகரிப்பது நாணயங்களை சேகரிப்பது போல அவ்வளவு கடினமில்லை என்றாலும் என்ன மாதிரியான தபால் தலைகளை சேகரிக்கிறோம் என்பதைப்பொறுத்து கடினத்துவம் மாறுபடும். முதலில் பல்வேறு நாடுகளின் தபால் தலைகளை சேகரிக்கவேண்டும் என்பதே எனது குறிக்கோளாக இருந்‌தது. ஆனால் இரண்டே மாதங்களில் எளிதாக நூற்றைம்பதிற்கும் மேலான நாடுகளின் தபால் தலைகளை சேகரிக்க முடிந்‌ததால், அரிய தபால் தலைகளை சேகரிக்கவேண்டும் என்று முடிவு செய்தேன். அந்த முறையில் கீழிருக்கும் தபால்தலை பல வகைகளில் அரியதாகும்.

இந்‌தியாவின் முதல் குடியரசுதினத்தை குறிப்பிடும் வகையில் 1950ம் வருடம் ஜனவரி 26ம் தேதி இந்‌த தபால் தலை வெளியிடப்பட்டது.
வெகு சில தபால் தலைகளிலேயே "Republic of India" என்ற பெயரைப் பார்க்கலாம்.
இந்‌த தபால் தலையைப்பற்றி மேல் விபரங்கட்கு இங்கே செல்லவும்.

இந்‌தியத் தபால் தலை பற்றிய சுட்டிகள்:
1. 1950ல் வெளியிடப்பட்ட மற்ற தபால் தலைகள்.
2. இந்‌தியத் தபால் தலைக்கள், அகர வரிசையில்.
3. இந்‌திய தபால்துறை

நாணயங்கள் - 2

2004-04-16T08:55:00.000-07:00

ரொம்ப நாள் வரை இந்‌த நாணயம் எந்த காலத்தினுடையது என்பது குழப்பமாகவே இருந்‌தது. பின்புதான் யாரோ ஒருவர், "அட இதில் தெலுங்கு எழுத்து இருக்கிறதே" என்று சொன்னார். இதற்காகவே "30 நாட்களில் தெலுங்கு பாஷை" புத்தகதை வாங்கினேன் . நாணயத்தின் ஒருபுறம் தெலுங்கில் "విజయ" (விஜய) என்ற எழுத்துக்கள் பொறிக்கப்பட்டுள்ளன.

காலம்: நாணயத்தின் நேர்த்தியைக் கொண்டு இது கடைக் கால விஜயநகரப் பேரரசின் காலமாக இருக்கலாம் என்று நினைக்கிறேன். (இவ்வளவு நேர்த்தியாக இருப்பதால் காலத்தைப் பற்றி ஒருவித சந்தேகமே இருக்கிறது).

நாணயத்தின் விட்டம்: அரை செ.மி. (நம்மூர் ஒரு பைசாவைவிட சிறியது, அது சரி ஒரு பைசா எப்படி இருந்‌தது என்கிறீர்களா?)

விளக்கம்:
முன்புறம்: ஒரு பெண் கடவுள், பத்மாசனத்தில் (லகஷ்மி?).

பின்புறம்: "விஜய" என்ற தெலுங்கு எழுத்துக்கள். விஜயநகர சாம்ராஜ்ஜியத்தின் நாணயங்களில் தேவநகரி, கிரந்தம், தெலுங்கு மற்றும் கன்னட எழுத்துக்கள் இருக்கும். மேலும் விஜயநகர சாம்ராஜ்ஜியத்தின் தலைநகர் எப்பொழுதும் "விஜய" என்றே அழைக்கப்பட்டது.

விஜயநகர் சாம்ராஜ்ஜியத்தின் நாணயங்கள் பற்றிய மிகவும் அருமையான தகவல்களுக்கு இந்த வலையகத்திற்கு செல்லவும்.

நாணயங்கள் - 1

2004-04-15T06:07:00.000-07:00

என்னிடம் இருக்கும் நாணயங்களிலேயே மிகவும் முக்கியமானது இது.

ஒரு சிறு கூழாங்கல் போலவே இருந்‌தாதால் பலநாட்கள் சீந்‌தப்படாமலேயே இருந்‌தது, பின்னர் ஒருநாள் தஞ்சை பெரியகோவிலிலுள்ள தொல்பொருள் காட்சிசாலையில் மேய்ந்‌துக் கொண்டிருக்கும் பொழுது அங்கு ராஜராஜ சோழன் காலத்து நாணயத்தின் பெரிய படத்தைப் பார்த்தேன். அப்பொழுதுதான் சட்டென்று பொறிதட்டியது, இது சோழர் காலத்து நாணயமேதான்.

காலம்: கி.பி. 985-1014
விளக்கம்:
முன்புறம்: அரியாசனத்தில் அமர்ந்‌திருக்கும் சோழன்(?)
பின்புறம்: கையில் மல்லிகையுடன் நிற்கும் கோஒலத்தில் சோழன்.
மேலதிக விபரங்கட்கு இங்கே சுட்டவும்.
தெளிவான படங்கள்:

விஜயபுரத்து விஜயம்

2004-04-15T02:21:00.000-07:00

நீண்ட இடைவெளிக்குப் பின்னர் விஜயபுரத்திற்குள் புத்தாண்டிற்காக நுழைந்‌தேன், ஐந்‌து நாட்கள் விடுமுறை வீட்டிலுள்ள எனது புத்தக அலமாரியை குடையும் வாய்ப்பு கிடைத்தது.
*********************************************************************

"உன்னோட ஹாபி என்ன?"

ஆறாம் வகுப்பில் புதிதாகச் சேர்ந்திருந்‌த நான் வகுப்பறையில் அப்பொழுத்துதான் நுழைந்தேன், நுழைந்‌தவுடன் வந்‌து விழுந்‌த கேள்வியை வெறித்துப்பார்த்துவிட்டு,

"ஹாபின்னா?" (காபி தெரியும் அது என்ன ஹாபி)

"ஹாபின்னா ஹாபிதான்", இதுகூட தெரியாதா என்பது போல பதில் வந்‌தது. அவன் அந்‌த வகுப்புத் தலைவனாக இருக்கவெண்டும, வகுப்பிளுள்ள அனைவரையும் பற்றி விபரங்களை சேகரித்துக் கொண்டிருந்‌தான்.

"மத்தவங்களெல்லாம் என்ன சொல்லியிருக்காங்க?"

என்னை ஏற-இறங்க பார்த்துவிட்டு தன் கையிலிருக்கும் புத்தகத்தை காண்பித்தான். அதில் நிறைபேருக்கு முன்னால் "ஸ்டாம்ப் கலெக்ஷன்" என்று எழுதியிருந்‌தது. ஒரு சிலர் பெயருக்கு முன்னர் "ஒன்றுமில்லை" என்றும் எழுதியிருந்‌தது.

"என்ன சீக்கிரம் சொல்லு"

"ஸ்டாம்ப் கலெக்ஷன்" (ஒன்றுமில்லை என்று சொல்லத் தயக்கம்).

என் பெயருக்கு முன்னால் நான் சொன்னதை கிறுக்கிவிட்டு அடுத்தவனைப் பார்க்க நகர்ந்‌தான்.அன்று அவன் எழுதியது ஒன்றும் புரியவில்லை, அடுத்த நாளே எனது ஆங்கில வாத்தியார் அதைப் புரிய வைத்துவிட்டார். அன்றைய பாடத்தலைப்பு "ஹாபீஸ்". பாடத்தை நடத்தி முடித்ததும் கையிலிருந்‌த வெள்ளத்தாளிலிருந்‌த்ததை படிக்க ஆரம்பித்தார்.

....
"கண்ணன் - ஸ்டாம்ப் கலெக்ஷன்" ...

"கண்ணன் நீ உன்னுடைய கலெக்ஷனை நாளை எடுத்து வா"

பகீரென்றது எனக்கு. "சார், நாளைக்கு வேண்டாமே"
....

"சரி, நாளைக்கு வேண்டாம். திங்கட்கிழமை எல்லாரும் அவங்களோட ஹாபியைப்பற்றி ஒரு கட்டுரை எழுதிட்டு வரணும். அப்போ கண்ணன் தன்னுடைய ஹாபியைப் பற்றி விளக்குவான்"

ஏன் எனக்கு மட்டும் இப்படி என்று நொந்துக்கொண்டு தலையாட்டி வைத்தேன்.

இன்னமும் ஐந்‌தே நாட்களில் ஹாபியென்றால் என்னவென்று தெரிந்‌துகொள்ளவேண்டும், அதோடு மட்டுமல்லாது ஸ்டாம்ப் கலெக்சன் என்றால் என்னவென்றும் தெரிந்‌து கொள்ளவேண்டும். அன்று முதல் பார்ப்பவர்களை எல்லாம் கேட்கத்தொடங்கினேன்

"உங்களோட ஹாபி என்ன?" ... (ஹாபி என்றாலே என்ன வென்று கேட்பதற்குத் தயக்கம்).

ஹாபியென்றால் பொழுதுபோக்கு என்பது தெரிய முழுசாக இரண்டு நாட்கள் பிடித்தது.
...
சரி .. சரி நீங்கள் கொட்டாவி விடுவது எனக்கு தெரிகிறது, விஷயத்திற்கு வருகிறேன். மேற்சொன்னபடி ஆரம்பித்த எனது "பொழுதுபோக்கு" நாளொரு ஸ்டாம்பும் பொழுதொரு காயினுமாக வளர்ந்‌தது. ஒரு சமயத்தில் என்னிடம் ஐந்‌தாயிரத்திற்கு குறையாமல் தபால் தலைகள் இருந்‌தன. சேகரிப்பிலிருந்‌த வெளிநாட்டு (மற்றும் அரிய உள்நாட்டு) நாணயங்களின் என்னிக்கை சுமார் ஐந்‌நூறை தாண்டியது. இம்முறை ஊருக்கு சென்றிருந்‌த பொழுது நான் சேகரித்த தபால் தலைகளையும் நாணயங்களையும் குடைந்‌தேன். அதிலிருந்‌த சில நாணயங்களையும் தபால் தலைகளையும் பற்றி அடுத்த பதிவுகளில் கொடுக்கிறேன்.

வலையில் சில சுட்டிகள்:
1. Philately.com
2. American philatelic society
3. Numismatics

தமிழ் புத்தாண்டு

2004-04-13T22:22:00.000-07:00

அனைவருக்கும் இனிய தமிழ்ப் புத்தாண்டு வாழ்த்துக்கள்

நிலவில் வேலை தேடலாம் வாங்க

2004-04-01T22:14:00.000-08:00

ஏப்ரல் 1ம் தேதி வந்ததும் வந்தது, அனைவரும் முட்டாள்களை தேடி அலைய ஆரம்பித்துவிட்டார்கள். கண்ணில் படுபவர்களை எல்லாம் முட்டாள்களாக்க முயற்ச்சி நடந்தது, ஆனால் அந்த முயற்சிகளையெல்லாம் கூகிளின் அறிவிப்பு ஏப்பம்விட்டுவிட்டது. நிலவில் அமைக்கப்படவிருக்கும் கூகிளின் கோபர்னிகஸ் மையத்திற்கான வேலைவாய்ப்பு விளம்பரம் அது. அழகான விளக்கங்கள், படங்களுடன் இந்த அறிவிப்பு இருந்தது (உதாரணத்திற்கு கீழே சில படங்கள்).
(கோபர்னிகஸ் மையத்தின் வெளியமைப்பு)
(கோபர்னிகஸ் மையத்தில் வேலையிடங்கள்)

ஏப்ரல் 1ம் தேதியின் மூலத்தைப் பற்றி அறிய இந்தக் கட்டுரையை பார்க்கவும் (ஹோலிப் பண்டிகையும் முட்டாள்கள் தினத்தை குறிப்பிடுவதாயிருக்கலாம் என்கிறது இந்த கட்டுரை).

மிகச் சிறந்த 100 ஏப்ரல் தின அறிவிப்புகள் பற்றி அறிய இங்கே சொடுக்கவும்.

கூகிளின் ஏப்ரல் தின அறிவிப்போடு வெளிவந்த மற்றுமொரு அறிவிப்பு கூகிளின் அஞ்சல் சேவை பற்றியது. ஜி-மெயில் எனப்பெயரிடப்ப்ட்டிருக்கும் இந்த சேவையில் 1000 மெகா பைட்டுகள் (ஹாட்மெயில் அஞ்சல் போல ஐந்நூறு மடங்கு அதிகம்) அளவில் அஞ்சல் பெட்டிகள் இலவசமாகக் கிடைக்கும் என்கிறது இந்த அறிவிப்பு. இந்த அறிவிப்பும் நம்பும் படியாக இல்லாததால் கூகிள் இன்று மற்றுமொரு அறிக்கையில் ஜி-மெயிலுக்கும் ஏப்ரல் 1ம் தேதிக்கும் சம்பந்தமில்லை என்றறிவித்திருக்கிறது.

தற்பொழுதெல்லாம் நல்ல இ-மெயில் முகவரி கிடைப்பது (இ-மெயில் மட்டுமல்ல எந்த ஒரு வலைத்தளத்திலும் நல்ல அடையாளப் பெயர் கிடைப்பது) குதிரைக் கொம்பாகிவிட்ட நிலையில் இந்த அறிவிப்பு ஒரு நம்பிக்கையை துளிர்விடச்செய்திருக்கிறது. ஆனாலும் இந்த ஆசாமி போல பலர் இருப்பது கவலை அளிக்கிறது. ( நானும் எனது ஜி-மெயில் முகவரிக்காக இப்பொழுதிலிருந்தே கர்சீஃப் போட வேண்டியது தான் போலிருக்கிறது)

எழுதுகிறேன் எழுதுகிறேன்

2004-03-23T23:47:00.000-08:00

சென்ற வாரம் தாத்தாவைக் காண சென்னை சென்றிருந்தேன். எப்பொழுது சென்னை சென்றாலும் தாத்தாவுக்கு ஹிந்து பேப்பர் படிக்கும் பொறுப்பு எனக்கு வந்துவிடும். இம்முறை தாத்தா எனக்கு வேறு வேலை வைத்திருந்தார்

"டேய் கண்ணா இங்கே வா.."

"இதோ தாத்தா.."

"ஒரு பேப்பர், பேனா எடுத்துண்டு வா"

"...."

"நான் சொல்லறதையெல்லாம் எழுதிக்கோ"

அவ்வளவு தான், மடமடவென்று தாத்தா சொல்ல ஆரம்பித்துவிட்டார். குச்சி போன்ற ஒரு வஸ்துவை (அதாங்க பேனா) வைத்துக்கொண்டு நான் பட்ட கஷ்டத்தை அவர் பார்த்திருக்க நியாயமில்லை. பேப்பரில் எழுதி அதுவும் தமிழில் எழுதி எத்தனை நாட்கள் ஆகிவிட்டன. தாத்தா வீட்டில் ஒரு பிரிண்டர் இல்லையே என்று வருத்தப்பட்டேன்.

பேனாவைத்தொட்டால் எனக்கு எழுதவரும் ஒரு(ரே?) விஷயம் என் கையெழுத்து தான் (கிரெடிட் கார்டு ரசீதில் கையெழுத்து இல்லையென்றால் ஒப்புக்கொள்ளமாட்டார்களே). ஆனாலும் தவறாமல் ஒரு பேனா மட்டும் என்னுடன் எப்பொழுதும் இருக்கும். அலுவலகத்தில் நான் செல்லும் ஒவ்வொரு மீட்டிங்கிற்கும் பேனாவும் கைப்புத்தகமும் என்னுடன் ஆஜராகிவிடும். பிறகு மீட்டிங் முடிவதற்குள் கைப்புத்தகம் முழுவதையும், சித்திர எழுத்துக்களால் நிரப்பிவிடுவேன் (மீட்டிங் எவ்வளவு நன்றாக இருந்தது என்பதை அந்த புத்தகத்தைவைத்தே தெரிந்துகொள்ளலாம்).சித்திர எழுத்துகளுக்கு பழகிப்போன என் கை அன்று நான்கு வரிகள் எழுதுவதற்குள் வலிக்கத்தொடங்கியது. பேசாமல் (என் சித்திர எழுத்துக்களையொத்த) ஜப்பானிய எழுத்துக்களை கற்றுக்கொள்ளலாமென்று பார்க்கிறேன். இப்பொழுது பத்தாம்/பனிரெண்டாம் வகுப்பு தேர்வு எழுதும் மாணவர்களை நிணைத்தாலே கைவலிக்கும் போலிருக்கிறது, நானும் ஒரு காலத்தில் அவ்வாறு பக்கம் பக்கமாக எழுதித் தள்ளியிருக்கிறேன் என்று நினைத்தால் மலைப்பாகவே இருக்கிறது.
எனக்கு தான் இப்படித் தோன்றுகிறதா இல்லை உங்களுக்குமா? வாக்களியுங்களேன்.

பின்தொடருகிறார்கள் ஜாக்கிரதை (2)

2004-03-11T09:30:00.000-08:00

பின் தொடருதலில் கவனம் தேவை என்று என்னுடைய முந்தைய பதிவில் சொல்லியிருந்தேன், ஆனால் அது மூவபிள் டைப் நிரலியை உபயோகப்படுத்துபவர்களுக்குத்தான் பொருந்தும். இப்பொழுது செய்தியோடை வசதியிலுள்ள இதுபோன்ற ஒரு ஜாக்கிரதையாக இருக்கவேண்டிய (கவனிக்கப்படவேண்டிய) விஷயம் (இது மூவபிள் டைப் உட்பட அனைத்து நிரலிகளுக்கும் பொருந்தும்).

( RSS, atom போன்ற செய்தியோடைகளைப்பற்றியும் அதன் நன்மைகளைப்பற்றியும் பலர் வலைப்பதித்திருக்கிறார்கள், விபரங்களுக்கு இந்தப்பதிவையும் பதிவிலுள்ள சுட்டிகளையும் பார்க்கவும்)

நாம் நமது வலைப்பதிவை பதிவிக்கும் பொழுது செய்தியோட்டைகளும் தானாகவே பதிவாகின்றன. இவ்வாறு பதிவான செய்தியோடைகளை படிப்பதற்கு "செய்தியோடைத்திரட்டிகள்" (RSS aggregators) உபயோகப்படுத்தப்படுகின்றன. செய்தியோடைத்திரட்டிகள் பல்வேறு செய்தியோடைகளை சில நொடிகள் சில முதல் நிமிடங்கள் வரை இடைவெளி விட்டு புதுப்பிக்க முற்படும். இவ்வாறு முற்படும்பொழுத ஏதேனும் புதிய பதிப்புகள் தெண்பட்டால் அதனை தரவுமாற்றம் (cache) செய்துகொள்ளும். இந்த தரவுமாற்றம் வசதி அனைத்து செய்தியோடை திரட்டிகளிலும் இல்லாமற்போனாலும், பெரும்பாலான திரட்டிகளில் உண்டு. இந்த தரவுமாற்றம் உத்தி செய்தியோடைகள் வேகமாக செயல்பட உதவுகின்றன. ஆனால் இந்த தரவுமாற்றத்தினால் சில சிக்கல்களும் உண்டு. உதாரணத்திற்கு இப்பொழுது ஒரு வலைப்பதிவாளர் தனது ஒரு புதிய பதிவினை உள்ளிடுகிறார் என்று வைத்துக்கொள்வோம், அவரது செய்தியோடையும் தானாகவே ப(பு)திப்பிக்கப்படும். இப்பொழுது அப்பக்கத்தை பார்வையிடும் செய்தியோடை திரட்டிகள் பதிவுகளை தரவுமாற்றம் செய்துகொண்டு அந்த வலைப்பதிவின் நகலை அதனுள் சேமித்து வைக்கும். அந்த வலைப்பதிவாளர் தனது பதிவினை பிறகு மாற்றினாலும் தரவுமாற்றம் செய்யப்பட்ட தகவல்கள் மாறாது. இதனால் என்ன என்கிறீர்களா?
உதாரணத்திற்கு "பெயரிலியின்" பதிவுகளை எடுத்துக்கொள்வோம் (பெயரிலி என்னை மன்னிப்பாராக). மாலைப்பெயரிலி, கண்கானிப்புப்பெயரிலி என்று மாற்றி மாற்றி பதிந்துகொண்டிருக்கும் பொழுது ஏதாவது ஒரு பெயரிலி பினாத்துவதற்குப்பதிலாக தன் சொந்தப்பெயரில் பதிந்துவிடுகிறார் என்று வைத்துக்கொள்வோம். அந்தப்பதிவினை சரிசெய்வதற்கு முன்னர் ஏதாவது ஒரு செய்தியோடைத்திரட்டி அந்தப்பதிவினை தரவுமாற்றம் செய்துவிட்டால் அவரின் குட்டு உடைபட்டுவிடும்.
இதைப்பற்றிய மற்றுமொரு (பட)விளக்கம் (வலைப்பூ ஆசிரியர் அருணா ஸ்ரீனிவாசன் தவறாக எடுத்துக்கொள்ளமாட்டார் என்ற நம்பிக்கையுடன்):

(படத்தை பெரிது படுத்த அதன்மேல் சுட்டவும்).

படத்திலிருப்பது எனது செய்தியோடை திரட்டியில் பதிவுகள் தெண்படும் விதம். இதில் வலைப்பூவிலிருந்து தரவுமாற்றம் செய்யப்பட்ட பதிவின் அசலையும் அதன் திருத்தப்பட்ட இடுகையையும் காணலாம்.

எனவே வலைப்பதியும் முன் இரண்டு முறையேனும் பதிவினை படித்துப்பார்ப்பது நல்லது.

(எச்சரிக்கை மேல் எச்சரிக்கையாக விடுத்துக்கொண்டிருக்கும் எனக்கு ஒரு எச்சரிக்கை வருவதற்கு முன் .... ஜூட்)

என் இங்கிலாந்து பயணம் (3)

2004-03-09T04:10:00.000-08:00

ஃபிரெஞ்சு விசா கிடைக்கவில்லையென்றவுடன் இங்கிலாந்து பயனத்தில் இருந்த அனைத்து உற்சாகமும் செத்துபோய்விட்டது போன்ற ஒரு உணர்வு ஏற்பட்டது. வேறு வழியின்றி (மனதிற்குள் நன்றாக வசைபாடிக்கொண்டே) "சரி விடுங்க என்னுடைய பாஸ்போர்ட், விமான டிக்கெட் எல்லாம் என்ன ஆச்சு" என்றேன்.
"அதை கூரியரில் அனுப்பியிருப்பார்கள்" என்றார்.
"அப்போ அனுப்பிட்டாங்களா இல்லையான்னு உங்களுக்கு தெரியாதா?"
"....."
"நீங்க உங்க மும்பாய் ஆபீஸ் நம்பரை கொடுங்க"
இப்பொழுதுதான் அவருக்கு சற்று உறைத்திருக்க வேண்டும், பிறகு அவரே மும்பாய் அலுவலகத்தை தொடர்பு கொண்டு எந்த கூரியரில் பாஸ்போர்ட் வந்து சேரும் என்ற தகவலை சொன்னார்.
"நாளைக்கு காலை அல்லது மதியம் வந்து சேர்ந்துவிடும்"
அப்பொழுது தான் எனக்கு உறைத்தது, மறுநாள் இரவு நான் இங்கிலாந்துக்கு கிளம்பியாகவேண்டும், ஆனால் பாஸ்போர்ட், டிக்கெட் எதுவும் என்னிடத்தில் இல்லை.
அன்று இரவு துக்கமே வரவில்லை, மறுநாள் காலை முதல் வேலையாக அக்கா அந்த கூரியர் அலுவலகத்தை தொலைபேசி மூலம் தொடர்பு கொண்டாள். என்னுடைய தபாலைத்தான் முதலில் கொண்டுசேர்ப்பார்கள் என்று உறுதிபடுத்திக்கொண்ட பிறகே தொலைபேசி துண்டிக்கப்படது. சொன்னதுபோலவே ஒரு ஊழியர் எனது தபாலை மட்டும் சுமந்துகொண்டுவந்து கொடுத்துவிட்டு போனார்.
எனது பாஸ்போர்ட்டையும் டிக்கெட்டையும் பார்த்தபிறகுதான் நிம்மதியாக மூச்சு விடமுடிந்தது.
அன்று இரவு (மறுநாள் காலை?) 1:30 மணிக்கு ஒருவழியாக விமானம் ஏறினேன்.

***************

இங்கிலாந்து வந்து சேர்ந்த பொழுது மணி மதியம் 1:30. ஹீத்ரோ விமான நிலையத்திலிருந்து ரெடிங்கிற்கு பஸ் மூலம் சென்றடைந்தேன். என் உபயோகத்திற்கு ஒரு காரை வாடகைக்கு எடுக்கலாமென்ற பொழுதும் நான் அதனை தவிர்த்துவிட்டேன். இங்கிலாந்தில் கார் ஓட்டுவது அவ்வளவு சுலபமல்ல. இந்தியா மாதிரியே சாலையின் இடது புறம் கார் ஓட்டும் பழக்கம் இங்கிலாந்தில் பின்பற்றப்பட்டாலும் சாலைவிதிகள் மிக அதிகம், அதனுடன் சாலையில் உள்ள குறியீடுகள் முதல் முறை பார்ப்பவர்களுக்கு குழப்பத்தையே அளிக்கும் (அமேரிக்க சாலை விதிகளைவிட குழப்பம் நிறைந்தது) .

ஏற்கனவே ஒருமுறை ரெடிங்கில் தங்கிய அனுபவம் இருந்ததால் என் ஹோட்டலை கண்டுபிடிக்க அதிக நேரமாகவில்லை. சென்ற முறை நான் ஒரு வீட்டினை வாடகைக்கு எடுத்து தங்கியிருந்தேன், அதனால் தங்கியிருந்த அனைத்துநாட்களும் என் சமையல்தான் (என் பகோடாவிற்கும் பஜ்ஜிக்கும் அங்கு ஒரு சிறு விசிறி குழுவே (ரசிகர் மன்றம்??) ஆரம்பிக்கப்பட்டது என்பதை நான் இங்கே குறிப்பிடவேண்டியதில்லை ). இம்முறை ஹோட்டலில் தங்குவதனால் சமைக்கமுடியாது, ஆனால் ஒரு மாதகாலமும் நினைத்த இடத்தில் சாப்பிடலாம் என்று எண்ணிய பொழுது நன்றாகவே இருந்தது. ஆகவே முடிந்த வரையில் இத்தாலியன், ஸ்பானிஷ் போன்ற அனைத்து விதமான உணவுகளையும் சுவைத்துவிடவேண்டும் என்று முடிவு செய்தேன்.

பின்தொடருகிறார்கள் ஜாக்கிரதை

2004-03-08T01:34:00.000-08:00

தற்பொழுது பின்தொடருதல்(Trackback) வசதி அனேகமாக எல்லா தமிழ் வலைப்பதிவுகளிலும் முளைக்க ஆரம்பித்துள்ளது. பின்தொடருதல் பதிவுகளை தொடர்பு படுத்த (அல்லது அல்கொய்தா மாதிரி வலை அமைக்க) நிச்சயமாக ஒரு மிக நல்ல வழிமுறை. கணினியே ஆனாலும் ஒருத்தரை பின்தொடரும் பொழுது ஜாக்கிரதையாக இருப்பது நல்லது. (இந்த இடத்தில் ஜாக்கிரதை என்ற வார்த்தையை விட கவனம் என்று உபயோகப்படுத்தி இருக்கலாம ஆனால் பதிவின் தலைப்பு நன்றாக இராதே ). மூவபிள் டைப் போன்ற சில வலைப்பதிவு நிரலிகள், பின்தொடருதலை தாமாகவே மேற்கொள்ளும் (எள் என்றால் எண்ணையாக கொண்டுவரும்). அதாவது நாம் ஏதாவது வலைக்குறிப்பை தொடர்புபடுத்தி பதிவு செய்திருந்‌தோமேயானால், மூவபிள் டைப் நமக்கு வேலை வைக்காமல் தானாகவே அந்‌த வலைக்குறிப்பின் கருத்தில் நமது குறிப்பின் முகவரியையும், அதன் சாரத்தையும் சேர்ப்பித்துவிடும். இவ்வாறு சேர்ப்பித்த சாரம் நமது வலைகுறிப்பில் இல்லாமல் நாம் தொடர்பு படுத்திய வலைகுறிப்பில் குடிகொண்டிருக்கும் அதனால் அந்‌த சாரத்தை நம்மால் மாற்ற முடியாது. இதனால் என்ன ஆகும் என்று கேட்கிறீர்களா?
நாம் ஏதாவது ஒரு விஷயத்தை தவறாக வலைகுறித்து விட்டு பிறகு நமது குறிப்பை மாற்றியமைத்தாலும் இந்த சாரம் காட்டிக்கொடுத்துவிடும்.
சரி இதனால் எனக்கு பின்தொடருதல் தேவையில்லை என்று தோன்றுகிறதா? கவலையை விடுங்கள், மேற்சொன்னது மூவபிள் டைப்பிற்கு மட்டும்தான் (நியூக்ளியஸ் எப்படி என்று எனக்குத்தெரியாது), உங்கள் தளம் ஹேலோ ஸ்கேன் போன்ற மூன்றாம் தளங்களிலிருந்‌து பின் தொடருதல் வசதியைப் பெற்றிருந்‌தால் இதுபோன்ற தானியங்கி பின் தொடருதல் நடைபெறாது. மேலும் மூவபிள் டைப் நிரலியில் நாம் இந்த செயல்பாட்டினை மாற்றியமைக்கலாம். எனவே நீங்கள் மூவபிள் டைப் (அல்லது அதுபோன்ற) நிரலியை உபயோகித்தால் அதில் பின் தொடருதல் வசதி எப்படி அமைக்கப்பட்டிருக்கிறது(அல்லது எப்படி வேலைசெய்கிறது) என்பதை தெரிந்துகொள்வது நல்லது.

புதிய புத்தகம்

2004-03-05T00:04:00.000-08:00

ரொம்ப நாட்கள் ஆகிவிட்டன நான் நல்லதொரு புத்தகம் வாங்கி. பெங்களூரில் இருப்பதும் ஒரு காரணம். நேற்றுதான் திரும்பவும் புத்தகத்தை தேடி பெங்களூர் லாண்ட்மார்க்ல் அலைந்‌தேன். தற்பொழுது திரு. ஃபிரெட்ஹெம் ஹார்டி எழுதிய "விரக பக்தி" என்ற புத்தகம் எனது நூலகத்தில் இடம் பிடித்திருக்கிறது.
என் இங்கிலாந்‌து பயணத்தில் ஏற்ப்பட்ட ஒரு முக்கியமான, மறக்கமுடியாத நிகழ்ச்சி நான் ஃபிரெட்ஹெம் ஹார்டியை சந்‌தித்ததுதான். அவர் வீட்டிற்கு செல்லும் வாய்ப்பும் கிடைத்தது.
அவர் வீட்டிற்கு சென்றபொழுது "வாங்கோ" என்றார், சுத்த தமிழில் (இது பற்றி விரிவாக எனது இங்கிலாந்‌து பயணத்தொடரில் எழுதுவேன்).

இங்கிலாந்‌து போட்டோக்கள்

2004-03-02T01:50:00.000-08:00

வலைப்பதிவின் படி நான் இன்னமும் இந்தியாவைவிட்டே கிளம்பவில்லை, ஆனால் இங்கிலாந்‌து பயணம் முடித்து, ஒரு வாரம் சொந்‌த விடுப்பும் முடித்து மறுபடியும் எனது கணிணியை தொந்‌தரவு செய்ய ஆரம்பித்துவிட்டேன். இந்த ஒரு வார இடைவேளையை சில படங்கள் மூலம் ஒப்பேற்றும் முயற்சியே இந்‌த பதிவு (காசி, ஐடியாவுக்கு நன்றி) .

ரெடிங்க் (மாலை 6 மணிக்கே ஊர் அடங்கிவிடும்)

கார்டிஃப் (வேல்ஸ் நாட்டின் தலைநகரம்) கோட்டை

கார்டிஃப் கோட்டையின் மத்தியில் உள்ள பாதுகாப்பு கோபுரம்

கார்டிஃப் ரக்பி விளையாட்டரங்கம்

நான் கார்டிஃப் சென்றிருந்‌த பொழுது ஆறு நாடுகளுக்கான ரக்பி பந்‌தயம் நடைபெற்றது, வேல்ஸ் ஆதரவு தொப்பியுடன் நான்

(சற்றே பெரிய படங்களை காண மேலிருக்கும் படங்களை சொடுக்கவும்)

எனது இங்கிலாந்து பயணம் (2)

2004-02-16T08:49:00.000-08:00

வெள்ளிக்கிழமை மதியம் பெங்களூரிலிருந்து கிளம்பி இரண்டரை மணி நேரங்கழித்து மாலை புது தில்லியில் வந்திறங்க வேண்டும்.
இரண்டரை மணி நேரமே பயணம் என்றாலும், பலமுறை பெற்ற அனுபவத்தால் அது எனக்கு ஒரு மிகப் பெரிய வேலையாகத் தோன்றியது. விமானப்பயணங்கள் ரயில் பயணங்கள் போல அவ்வளவு இனிமையாக இருப்பதில்லை. நிச்சயமாக முதல் முறை விமானத்தில் பயணிக்கும் பொழுது ஏற்படும் மகிழ்ச்சி மற்றும் பயம் கலந்த அனுபவம் நன்றாகத்தானிருக்கும், ஆனாலும் ஏனோ அது அடுத்தடுத்த பயணங்களில் காணாமற்போய்விடுகிறது.
முதல் முறை பயணிக்கும் பொழுது, ஜன்னல் இருக்கைதான் வேண்டும் என்று விமானப் பணிப்பெண்ணிடம் அடம்பிடித்தது இன்னமும் நினைவிலிருக்கிறது . அப்பொழுது எனக்கு முன்னர் வரிசையில் இருந்தவர் தயவு செய்து ஜன்னல் இருக்கை வேண்டாமென்று கேட்டுக்கொண்டிருந்ததைப் பார்த்து ஒரே ஆச்சரியப்பட்டேன். உள்நாட்டு விமானங்களில் ஜன்னல் இருக்கை ஒரு பெரிய விஷயமில்லைதான் ஆனால் போயிங் 747 போன்ற விமானங்களில் ஜன்னல் இருக்கைக்கு ஆசைப்பட்டால் "மறக்கமுடியாத" பயண அனுபவங்கள் ஏற்படுவது நிச்சயம்.

முன்பு ஒரு முறை சிங்கப்பூரிலிருந்து கலிஃபோர்னியா பயணத்தின் போது ஏற்பட்ட அந்த "மறக்கமுடியாத" ஜன்னல் இருக்கை அனுபவத்தால் (14 மணிநேர தொடர் பயணம் எகானமி வகுப்பில்) இம்முறை பயணத்தின் போது நடைபாதையோர இருக்கை கிடைத்ததும்தான் நிம்மதி வந்தது. விமானத்தில் ஏறும்பொழுது தனிமையை போக்கும் எனது ஆயுதங்கள் இருக்கின்றனவா என்று இருமுறை சரி பார்த்துக்கொண்டேன், அவை:
1. எனது (கை)பைக்கணிணி
2. நான் படித்துக்கொண்டிருக்கும் புத்தகங்கள்.
3. கடைசி ஆயுதம் ஒரு கர்சீஃப், (கண்ணில் கட்டிக்கொண்டு தூங்கினால் தனிமையாவது மண்ணாவது, உலகம் இருப்பதே மறந்துவிடும்).
இவ்வளவும் பெங்களூர் தில்லி பயணத்திற்கே, அப்பொழுது தில்லி-லண்டன் பயணத்தைப் பற்றி நினைக்கும் நிலையில் நான் இல்லை.

பெங்களூர் விமான நிலையத்தை அடைந்தபொழுதிலிருந்தே கையில் அப்பொழுது படித்துக்கொண்டிருந்த புத்தகத்தை எடுத்து வைத்துக்கொண்டேன். ஃப்ரிஜாப் காப்ரா எழுதிய "டாவோ ஆஃப் பிசிக்ஸ்" என்ற புத்தகம் அது. சிறு வயது முதலே அறிவியல் மற்றும் வானவியலில் ஆர்வம் அதிகமாக இருந்ததால் நான் படிக்கும் புத்தகங்களில் பல இது போன்றிருப்பதில் ஆச்சரியமில்லை. இப்புத்தகத்தில் காப்ரா கீழை நாடுகளின் தத்துவங்களையும் மத வழக்கங்களையும் தற்பொழுதைய அறிவியல் கண்டுபிடிப்புகளுக்கு ஒப்பிடுகிறார். புத்தகம் முழுவதிலும் இந்து மற்றும் பௌத்த மதங்களின் நெறிகளும் போதனைகளின் ஆதிக்கமே இருந்தது. அறிவியலையும் ஆன்மிகத்தையும் வேறுபடுத்தியே பார்(கும்)த்த நம் மனநிலைகளுக்கு ஒரு பேராச்சரியமாக இப்புத்தகம் இருக்கும் என்பது நிச்சயம். அப்புத்தகத்தை படிக்கும் பொழுது நான் படித்துக்கொண்டிடுந்த மற்றொரு புத்தகமான "யுனிவர்ஸ் இன் எ நட்ஷெல்" மனதில் ஓடிக்கொண்டே இருந்தது. ஒரு புத்தகம் முற்றிலும் அறிவியல் கண்ணோட்டத்தின்படி எழுதப்பட்டது, மற்றொன்றோ ஆன்மிகக் கண்ணோட்டத்தின் மூலம் அறிவியல் கண்டுபிடிப்புகளை பார்க்கும் வகையில் எழுதப்பட்டது ஆனால் இரண்டு புத்தகங்களுக்கும் நிறைய ஒற்றுமை இருப்பதாகவே எனக்குப்பட்டது. (அப்புத்தகங்கள் பற்றி தனியாக வலைப்பதிய வேண்டும்).

புத்தகத்தை படித்துக்கொண்டிருந்ததாலும், அதனை மற்றொரு புததகத்துடன் ஒப்பிட்டு ஆச்சரியப்பட்டுக்கொண்டிருந்ததாலும், எனது பாஸ்போர்ட் மற்றும் லண்டன் டிக்கெட் பற்றிய நினைவுகள் தொல்லைசெய்யவில்லை. எனது பாஸ்போர்ட் மற்றும் டிக்கெட்டுகள் அன்றே மும்பையிலிருந்து கூரியர் மூலம் புறப்பட்டாக வேண்டும், டில்லி விமான நிலையத்தில் இறங்கிய பின்னரே இது எனக்கு பலமாக உரைத்தது.முதல் முறையாக கலக்கம் சற்றே எட்டிப்பார்த்தது. அக்காவும் அத்திம்பேரும் தவறாமல் எனக்காக காத்திருந்தார்கள். அவர்களைப் பார்த்தபிறகே கொஞ்சம் நிம்மதி கிடைத்தது.
உடனே பெங்களூருக்கு போன் செய்து எனது பயண ஏற்பாட்டாளரை அழைத்தேன்.

"கண்ணன் ஒரு கெட்ட செய்தி, உங்களுக்கு ஃபிரஞ்ச் விசா கிடைக்கவில்லை"

(தொடரும்)

எனது இங்கிலாந்து பயணம்

2004-02-13T09:28:00.000-08:00

"கண்ணன், இன்றையிலிருந்து மூன்றாவது வாரம் நீ ரெடிங்கில் இருக்கவேண்டும்", எனது "பாஸ்" என்னிடம் சொல்லிவிட்டு சென்றார். ஏற்கனவே இதை எதிர்பார்த்திருந்ததால் ஒரு ஆச்சரியத்தையும் மகிழ்ச்சியையும் வெளிப்படுத்தாமல் தலையாட்டிவைத்தேன் .

ஒரு மாத பயணமே ஆயினும், தனியாக செல்லவேண்டியிருந்ததால் என் இஷ்டப்படி ஐரோப்பாவை ஒரு சுற்று வந்துவிடவேண்டும் என்ற ஆயத்தம் செய்து கொண்டு இங்கிலாந்து பயண ஏற்பாடுகளை துவங்கினேன். இது இங்கிலாந்திற்கு எனது இரண்டாவது விஜயம், இம்முறை ஐரோப்பா கணவுகளும் சேர்ந்துகொண்டதால் வெகு உற்சாகத்துடன் ஆயத்தமானேன், ஆனால் பயண ஏற்பாடுகளில் வந்த தடங்கல்கள்(சிக்கல்கள்?) படிப்படியாக எனது உற்சாகத்தை விழுங்க ஆரம்பித்தன.

முதலில் எனது பயண ஏற்பாட்டாளர் செய்த குளறுபடியால் தவறான விசா ஃபாரத்தை உபயோகித்து பிரிட்டன் விசாவிற்கு விண்ணப்பித்தேன். ஒரு வாரம் கழித்து, மீண்டும் விசாவிற்கு விண்னப்பிக்க வேண்டியதாயிற்று. இந்த ஒரு வார தாமதம், பிரிட்டன் பயணத்தை பாதிக்கவில்லையெனினும், எனது ஐரோப்பா கணவின் மீது இடியாக விழுந்தது. கிளம்புவதற்கு ஒரு வாரமே இருந்த நிலையில் ஃபிரெஞ்சு விசாவிற்கு விண்ணப்பித்தேன்

"ஃபிரெஞ்சு விசா இரண்டே நாட்களில் கிடைத்துவிடும், கவலையே படவேண்டாம்" - இது என் பயண ஏற்பாட்டாளர் .

நான் நினைத்தபடியே இரண்டு நாட்களுக்கு எதுவும் நடக்கவில்லை.

மூன்றாம் நாள், "நீங்க ஃபிரான்சில் தங்குவதற்கு இன்டெர்நெட்ல ஹோட்டல் புக் செஞ்சிருக்கீங்க, ஃபிரெஞ்சு எம்பஸில இத ஒத்துக்கமாட்டேங்கிறாங்க" என்று ஒரு குண்டைத்தூக்கிப் போட்டார். ஃபிரான்சில் நான் தங்குவதற்காக ஏற்பாடு செய்திருந்த யூத் ஹாஸ்டலை தொலைபேசி மூலம் தொடர்புகொண்டு, ஃபேக்ஸ் மூலம் எனது பதிவிற்கான அத்தாட்சியை அணுப்பபெற்றேன் (இதற்கு இரண்டு முறை தொலைபேசியில் அந்த ஃபிரெஞ்சு யூத் ஹாஸ்டலை தொடர்பு கொண்டதும், மறுமுனையில் இருந்த ஃபிரெஞ்சு பென்மணியிடம் எனது நிலையை அவருக்கு புரியும்படியான ஆங்கிலத்தில் எடுத்துரைத்ததும் தனி கதை).

"இன்னும் ஒரே நாளில் விசா வந்துவிடும், கவலையே படாதீங்க"

அடுத்த நாள் (வியாழன்), "இன்றக்கு உங்கள் பாஸ்போர்ட், டிக்கெட் எல்லாம் ஃபிரெஞ்சு எம்பஸிக்கு போயிருக்கிறது, நாளைக்கு வந்துவிடும்". புன்னகையுடன், மிகவும் நம்பிக்கையாக (வேறு யார் எனது பயண ஏற்பாட்டாளர்தான்).

நான் வெள்ளிக்கிழமை பெங்களூரிலிருந்து கிளம்ப வேண்டும், ஆனால் எனது பாஸ்போர்ட் மற்றும் லண்டன் விமான டிக்கெட் மும்பாயிலுள்ள ஃபிரஞ்சு எம்பஸியில்.
என் பயண ஏற்பாட்டாளர், வெள்ளிக்கிழமை மாலை எனது பாஸ்போர்ட்டை ஃபிரெஞ்சு எம்பஸியிலிருந்து பெற்று எனக்கு அனுப்புவதாக சூடம் ஏற்றாமல் சத்தியம் செய்ததால் வேறு வழியில்லாமல் பெங்களூரிலிருந்து டில்லிக்கு எனது பாஸ்போர்ட், லண்டன் டிக்கெட் மற்றும் இன்ஷூரன்ஸ் இவை எதுவும் இல்லாமல் பயணத்தை துவங்கினேன்....

(தொடரும்)

டிஜிடல் காமிரா

2004-02-11T09:27:00.000-08:00

இது காமிரா வாரம் போல. எல்லா வலைப்பதிவிலும் டிஜிடல் காமிரா, ஜேம்ஸ் பான்ட் காமிரா என்று ஒரே காமிராமயம். சரியென்று நானும் காமிரா பற்றி பதியறேன். (போன வாரமே காமிரா வாங்கிவிட்டு சும்மா இருந்தா எப்படி ).

டிஜிடல் காமிரா வாங்குவதற்கு முன் நான் கற்றுக்கொண்ட சில விஷயங்கள் (காமிரா வாங்க நினைப்பவர்கள் கவணிக்க):

காமிரா பற்றிய ஆராய்ச்சி தேவை ஆனால் புதிய மேம்பட்ட காமிராவுக்காக காத்திருந்தால் காமிராவே வாங்க முடியாது
காமிரா வாங்கிய பின் சில நாட்களுக்கு காமிரா பற்றிய வலைத்தளங்களுக்கு செல்வதை தவிர்க்கவும் (இது இளகின மனது உடையவர்களுக்கு மட்டும்).
3 - 4 - 5 மெகாபிக்ஸல்கள்: படங்களை ஃபோட்டோ தாளில் பிரின்ட் செய்யும் எண்ணமிருந்தால் இதைப்பற்றி கவலைப்படலாம், இல்லையெனில் 3 மெகாபிக்சலே போதுமானது. (3 மெகா பிக்ஸல் கொண்ட ஒரு படம் சுலபமாக 600 கிலோ பைட் வரை எடுத்துக்கொள்ளும், இது மின்னஞ்சலில் அனுப்புவதற்க்கு ஏற்றதல்ல).
மெமரி கார்டு: காமிரா வாங்குவதற்கு முன்னர் மெமரி கார்டு எந்த வகையைச் சார்ந்ததென்று தெரிந்திருக்க வேண்டும். இப்பொழுது சந்தையில் 6 - 7 வகையான மெமரி கார்டுகள் கிடைக்கின்றன. மெமரி கார்டுகள் காமிராவுக்கு மட்டுமல்லாது வேறு பலவற்றுக்கும் உபயோக்மானவை. (உ.ம். ஃபிளாப்பிகளுக்கு மாற்றாக கோப்புகளை சேமித்து வைக்க உபயோகப்படுத்தலாம், இவ்வாறு செய்வதானால் இந்த கருவியையும் வாங்குவது உத்தமம்.)

சரி இப்பொழுது நன் வாங்கிய காமிராவுக்கு வருவோம்:

(அசல் அளவுகளில்)

நிகான் தயாரிப்பான கூல்பிக்ஸ் 3700 காமிரா அது. மூன்று மில்லியன் பிக்ஸல்கள் கொண்ட படங்களை எடுக்கவல்லது. ஆனால் என்னைக் கவர்ந்தது இதிலுள்ள வீடியோ வசதி. தொலைக்காட்சிப் பெட்டியில் துல்லியமாக தெரியுமளவிற்கு வீடியோ எடுக்க வல்லது. 128 மெகா பைட் மெமரி அட்டையில் 120 நொடிகள் வரை படமெடுக்கலாம் (சற்றே தெளிவு குறைந்த படமாக எடுத்தால் 900 நொடிகள் வரை எடுக்கலாம்). வீடியோ படத்துடன் ஒலியையும் பதியலாம். வீடியோ படங்கள் அனைத்தும் க்விக் டைம் ஃபார்மாட்டில் இருப்பதால் பிஸி திரையிலும் துல்லியமாக தெரிகின்றன.

இவ்வளவும் ஒரு கையடக்க பெட்டியினுள்.

புது வெள்ளை மழை

2004-01-29T09:36:00.000-08:00

வலையகத்திற்கு வந்து ஒரு வாரமாகிவிட்டது. இந்த ஒரு வார காலத்தில்:
1. நான் பெங்களூரிலிருந்து கிளம்பி தில்லி வந்து சேர்ந்தேன் பிறகு
2 தில்லியிலிருந்து கிளம்பி ஃப்ராங்ஃபர்ட் வழியாக லண்டன் வந்து சேர்ந்துள்ளேன்

எனது அலுவலகம் லண்டன் அருகே உள்ள ரெடிங் என்ற இடத்தில் உள்ளது. அடுத்த ஒரு மாதம் இங்கு தான் வாசம்.
ஏற்கனவே ரெடிங்கிற்கு ஒரு முறை வந்த அனுபவமுள்ளதால் இம்முறை கொஞ்சம் சேக்கிரமே பழகிவிட்டது. சென்ற முறை ரெடிங்கிற்கு மார்ச் மாத கடைசியில் வந்ததால் பெங்களூர் போன்ற வானிலையே இருந்தது ஆனால் இம்முறை சரியான குளிர் காலத்தில் வந்துள்ளேன் என்பது கேத்ரொ விமான நிலையத்தில் இறங்கும் பொழுதே தெரிந்துவிட்டது. நல்ல வேளையாக கையுரை முதற்கொண்டு அனைத்து குளிர் போக்கிகளை கொண்டு வந்திருந்தேன்.

முதல் இரண்டு நாட்கள் சாதாரனமாகத்தான் சென்றன. ஆனால் நேற்று ஆரம்பமுதலே குளிற் சற்று தூக்கலாக இருந்தது. மாலை கோட்டலிற்கு செல்ல பஸ் நிறுத்ததில் நிற்கும் பொழுதுதான் எல்லாம் ஆரம்பித்தது. முதலில் இடியுலன் மழை, சரியான காற்று வேறு. பிறகு, என் வாழ்கையின் முதல் பனிமழை, மிகவும் இதமாஇ (இப்படி எழுதனும்னு தான் தோனுது, ஆனால் நேற்று இருபது நிமிடம் குளிரில் நடுங்கியபடி நின்றது எனக்குத்தான் தெரியும்).

ஒருமணி நேரமே பெய்த பனி மழையானாலும் விளைவு பெரிதாக இருந்தது, நேற்று இரவு வெப்பனிலை மைனஸ் நான்கு டிகிரியாக இருந்ததால் ரெடிங் இன்றும் பனிட்துளிகளும் உறைந்து போன பனிக்கட்டியுமாகக் காட்சியளிக்கிறது.

ஹாவ்வ்வ்.....

2004-01-21T00:04:00.000-08:00

ரொம்ம்ப நாளா தூங்கிவழிந்துகொண்டிருக்கும் என் வலைப்பதிவைக் காண இன்று தான் நேரம் கிடைத்தது. இனியும் தூங்கிவழிந்தால் நன்றாக இராதென்பதால் இதோ ஆரம்பித்து விட்டேன் . வலைப்பதிவு தான் தூங்கியதே தவிற நான் (நன்றாக) தூங்கி சில நாட்கள் ஆகின்றன . இரண்டு வாரங்களாய் பாடாய் படுத்திக்கொண்டிருந்த வேலைப்பளுவும் சற்றே குறைந்திருக்கிறது.

2004-01-09T06:06:00.000-08:00

புத்தாண்டு - 2004

"புத்தாண்டு தினத்தன்று என்ன தொடங்குகிறாயோ அதையே வருடம் முழுவதும் செய்வாய்" - சின்ன வயதில் புத்தாண்டு அன்றாவது எங்களைக் ஒழுங்குபடுத்த அம்மா சொல்வது.
இந்த புத்தாண்டன்று வேலையைப் பற்றி சற்றே நினைத்துவிட்டேன் போலிருக்கிறது, இடத்தை விட்டு நகரமுடியாமல் அவ்வளவு வேலை. சீக்கிரமே வலைப்பதிய மீண்டு(ம்) வருவேன்.
(கிடைத்த கொஞ்சம் நேரத்தை பதிவுப் பக்கங்களை சீர்படுத்த உபயோகித்துவிட்டேன்).

2003-12-25T02:49:00.000-08:00

2003-12-22T11:16:00.000-08:00

விஜயபுரத்து விஜயம்

"மார்கழி மாதம் என்றதும் சிலபேருக்கு எப்படி சங்கீத ஞாபகம் வந்துவிடுகிறதோ" என்று இவ்வார வலைப்பூ வாத்தியார் எம்.கே. குமார் கேட்டிருக்கிறார். மற்றவர்களுக்கு எப்படி என்று தெரியாது ஆனால் ஒவ்வொரு வருடமும் அந்த பாடல்கள் ஒலிக்காமல் எனது மார்கழிக் காலை விடிவந்ததில்லை அதனால்தானோ என்னவோ இப்பொழுதும் வலையின் வாயிலாக அந்த பாடல்களைக் கேட்டுக்கொண்டிருக்கிறேன் :-).

இனி மீன்டும் விஜயபுரத்துக்கு...

மார்கழிப் பொங்கல், லெக்ஷ்மிநாராயணப் பெருமாளுக்கு அந்தப் பொங்கலைப் பற்றி என்ன அபிப்பிராயம் என்று எனக்குத்தெரியாது ஆனால் எனக்கு அது அமிர்தமாக இருந்தது. இப்பொழுதும் பெங்களூர் பொங்கலை சாப்பிடும் (குடிக்கும்) பொழுது அந்த எண்ணம்உறுதிப்படுகிறது. பொங்கல் மட்டுமல்ல பெருமாள் கோவிலில் புளியோதரை பிரசாதம் என்றால் அன்று வேறெதுவும் சாப்பிட வேண்டாம் எனக்கு. கோவில் அர்ச்சகர் கைவண்ணம் அவ்வளவு பிரமாதமாக இருக்கும். கோவில் பிரசாதம் எங்கள் வீட்டு உபயம் என்றால் அவ்வளவுதான் குஷியில் பெரிய துள்ளலே போட்டுவிடுவேன், பின்னே துனி மூடிய வெண்கலப் பாத்திரத்தில் பிரசாதம் வீடு தேடி வரும் என்றால் சும்மாவா இருக்க முடியும்.

மார்கழியில் மறக்க முடியாத வேறு ஒன்று கல்யாணமகாதேவி, அம்மா பிறந்த கிராமம். திருவாரூரிலிருந்து மன்னார்குடி செல்லும் வழியில் காட்டாற்றுக் கரைகளிலே அமைந்திருக்கும் இனிமையான கிராமம். கிராமத்தில் அதிகம் பயிரிடும் கரும்பு கூடுதலாக இனிப்பைச் சேர்க்கும்.

ஒவ்வொரு வருடமும் தேர்வு விடுமுறைக்கு தவறாமல் சென்றுவிடும் இடம். சில வருடங்கள் அரையாண்டுத் தேர்வு விடுமுறைக்கும் சென்று விடுவேன். நான் மட்டும் தனியாக இருந்திருந்தால் இந்த அளவிற்கு மனதில் நின்றிருக்காது என்றே சொல்ல வேண்டும். பின்னே எனது நான்கு மாமாக்கள், நான்கு சித்திகள் மற்றும் வாண்டுகள் மொத்தமும் சேர்த்து 20 உறுப்படிகள் கூடும் இடமென்றால் கொண்டாட்டம் தானே. அரையாண்டுத் தேர்வு விடுமுறைக்கு இதில் பாதி கூட்டமாவது இருக்கும். அச்சமயங்களில் அந்த கிராமமே களை கட்டும். அங்கும் கோவிலை ஒட்டினார்போல வீடு எங்களுடையது, நாங்கள் வந்து போகும் சமயங்கள் தவிர பாட்டி அங்கு சிலந்தி மற்றும் இன்ன பிற பூச்சிகளுடன் குடியிருக்கும் இடமது.

கிராமத்துக் கோவில் அர்ச்சகரும் திருவாரூர்க் கோவில் அர்ச்சகரும் ஏதோ ஒருவகையில் சொந்தமாக இருந்திருக்க வேண்டும், பின்னே இருவரும் பொங்கலை எப்படி அச்சசல் ஒரே மாதிரி செய்ய முடியும்? கிராமத்தில் இருப்பதால் பொங்கலுக்கு போட்டி குறைவு, வீடு தேடி வந்து விடும். இருந்தாலும் வாண்டுகள் அனைவரும் சேர்ந்துக்கொண்டு "சிற்றஞ் சிறுகாலே" கோவிலுக்குப் படையெடுப்பது வாடிக்கை.

2003-12-16T10:47:00.000-08:00

விஜயபுரத்து விஜயம்....

"கண்ணா மணி நாலாச்சு எழுந்திரு ..."
"இன்னும் ஒரு நிமிஷம் அப்பா.."
...
"கண்ணா மணி நாலரை, எழுந்திரு .."
"ஒரே ஒரு நிமிஷம்மா..."
"கண்ணா எழுந்திருக்கப்போறியா இல்லியா? கோவில்ல மணி அடிக்க ஆரம்பிச்சாச்சு", இது அப்பா.

ஒவ்வொரு வருடமும் மார்கழி காலையில் விஜயபுரத்திற்கே கேட்கும் உரையாடல் இது. வீட்டில் படுக்கையறை வாசற்புரத்திற்க்கு அருகாமையில் இருப்பதால் நிச்சயம் கோவிலுக்கு வருபவர்கள் வெங்கடேச சுப்ரபாதத்திற்கு முன்னர் இதைத்தான் கேட்பார்கள்.
மார்கழி மாதம் ஆரம்பித்துவிட்டாலே போதும், தினசரி நான்கு மணிக்கே விழித்துக்கொள்ளும் அம்மா மூன்றுமணிக்கே எழுந்துவிடுவாள். ஏழு மணி வரைத்தூங்கும் எனக்கு கோவில் மணி ஒரு சிம்ம சொப்பனமாகவே இருந்தது, கும்பகர்ணன் ஆறு மாதம் ஒரு சேரத் தூங்குவானாமே? ஒரே பொறாமையாக இருக்கும்.

நாலரை மணிக்கு தூக்க கலக்கத்தோடு வாசற்புரம் வந்து அம்மா இடும் கோலத்தைப் பார்வையிடுவது எனது வாடிக்கை. மற்ற நாட்களை விட மார்கழி மாதக் கோலம் மிகவும் பிரம்மாண்டமாக இருக்கும். தெருவில் பல வீடுகளில் வண்ணக்கோலங்கள் போட்டிருப்பார்கள், ஆனாலும் அம்மாவின் வெள்ளை மற்றும் காவியிலான கோலமே மிகவும் நேர்த்தியாக இருக்கிறதென்று தோன்றும்.

பெருமாள் கோவில் கிராமபோனின் உதவியோடு மார்கழி மாதம் முழுவதும் டி.எம்.எஸ் "புல்லாங் குழல் கொடுத்த மூங்கில்களை" கண்ணனின் புகழ் பாட அழைப்பார். எஸ்.பி.பியும் தன் பங்கிற்கு "ஆயர்பாடி மாளிகைக்கு" சென்று தாலாட்டு பாடிவிட்டு வருவார். எல். ஆர். ஈஸ்வரி, "கோபியர்களைக்" கூப்பிடுவார். பி.சுசிலா "குருவாயூருக்கு" அழைத்து செல்வார். எஸ். ஜானகியோ "கோகுலத்தின் பசுக்களையே" பாட வைப்பார். இந்த பாட்டுக்கள் இல்லாத மார்கழி மொட்டையில்லாத திருப்பதி போல இருக்கும். அல்லது பெங்களூர் மாதிரி :-( இருக்கும்.

லெக்ஷ்மிநாராயணப் பெருமாள் காலை நான்கு மணிக்கே பிஸியாகிவிடுவார். மற்ற நாட்களில் கோவில் பக்கமே எட்டிப்பார்கத சுட்டிப் பயல்கள் கூட காலையில் நான்கு மணிக்கே "மடிநிறையப் பொங்க"லுக்காக கோவிலில் சமர்த்துப் பிள்ளைகளாக ஆஜராகி விடுவார்கள். பெருமாளும் அவர்களை ஏமாற்றியது இல்லை, சில சமயம் போனஸாக சர்கரைப்பொங்கல் அல்லது ததியோன்னம் (தயிர் சாதம்) என்று வழங்கி ஊக்கப்படுத்துவார். மிகவும் சுறுசுறுப்பான சில சுட்டிகள் பெருமாளிடம் போனஸை வாங்கிவிட்டு தெருவின் அடுத்த கோடியிலுள்ள பிள்ளையாரிடமிருந்தும் பொங்கலை சேகரித்து விடுவார்கள். ஐந்து நிமிட இடைவெளிக்குள் அரை கிலோமீட்டர் தூரத்தை கடக்க வேண்டுமென்பதாலும், பெருமாளின் தனி கவனிப்பு இருந்ததாலும் நான் அந்த போட்டிக்கு "காய்" விட்டுவிடுவேன்.

(விஜயபுரத்து மார்கழி விஜயம் தொடரும்...)

2003-12-16T04:29:00.000-08:00

2003-12-15T23:33:00.000-08:00

மார்கழித் திங்கள்


மார்கழித் திங்கள் மதி நிறைந்த நன்னாளால்

     நீராடப் போதுவீர் போதுமினோ நேரிழையீர்

சீர் மல்கும் ஆய்ப்பாடிச் செல்வச் சிறுமீர்காள்

     கூர்வேல் கொடுந்தொழிலன் நந்தகோபன் குமரன்

ஏரார்ந்த கண்ணி யசோதை இளம் சிங்கம்

     கார் மேனி செங்கண் கதிர் மதியம் போல் முகத்தான்

நாராயணனே நமக்கே பறை தருவான்

     பாரோர் புகழப் படிந்தேலோர் எம்பாவாய்

                                              (திருப்பாவை 01)

இன்று மார்கழி முதல் அடியெடுத்து வைக்கிறாள். மார்கழி முதல் நாள் காலை 5:30 மணிக்கே எழுந்துவிட்டேன் (இந்தியா-ஆஸி மேட்ச் மிஸ் பன்ன முடியுமா? ;-) ).
திருவாரூரில் இருக்கும் பொழுது "மார்கழித் திங்கள் மடி நிறைய பொங்கல்" என்று ஆரம்பிக்கும் மார்கழி இவ்வருடம் சர்க்கரைப் பொங்கலோடு ஆரம்பித்திருக்கிறது. 22 வருடங்களுக்குப் பிறகு இந்தியா ஆஸ்திரேலியாவை அவர்கள் கோட்டையிலேயே வென்றிருக்கிறது, நல்ல ஆரம்பம். ஹேலியின் வால்நட்சத்திரத்தைப் பார்த்தது போல் குஷி எனக்கு (அடுத்த முறை பார்ப்பதற்கு எத்தனை வருடங்கள் காத்திருக்க வேண்டுமோ?).

2003-12-03T07:47:00.000-08:00

விஜயபுரத்து விஜயம்

Permanent Address:
17 தி. அக்ரஹாரம்
விஜயபுரம்
திருவாரூர் - 610 001

முகவரியை எழுதும்போதே நினைவுகள் பின்னோக்கி செல்லத்துவங்கின. பத்து நாட்களுக்கு மேல் தொடர்ந்து அங்கே இருந்ததாக கடந்த பத்து வருட ஞாபகங்கள் சொல்லவில்லை. ஆனால் பத்து வருடங்கள் ஆகியும் அந்த நினைவுகள், இன்றும் சுகமான அலைகளை எழுப்பிக் கொண்டிருக்கின்றன.
எப்படி மறக்க முடியும் அந்த முகவரியை, அந்த வீட்டை, அந்த நினைவுகளை.

இனிஷியலோடு கூடிய ஒரே தெரு அந்த "தி. அக்ரஹார"மாகத்தானிருக்க முடியும். பலவருடங்களாக எனக்கு அந்த இனிஷியல் விவகாரம் விளங்கவில்லை, பின்னர் தமிழ் வாத்தியாரிடமிருந்து திட்டுக்களோடு வந்த தமிழ் எழுத்துருவங்கள், தெரு முனையில் இருந்த பலகையைப் படிக்க உதவின. அப்பொழுது தான் தெரிந்தது அது "தியாகராஜபுரம் அக்கிரகாரம்" என்று (தற்பொழுது வேறொரு பலகை "தியாகராஜபுரம் தெரு" என்று பல்லிளித்துக் கொண்டிருக்கிறது).
கிழக்கும் மேற்குமாக அமைந்ததாலோ என்னவோ, தெருவின் இரு முனைகளிலும் இரு கோவில்கள். மேற்கு எல்லையில் லெக்ஷ்மி நாராயணப்பெருமாளும், கிழக்கு எல்லையில் வினாயகரும் குடிபெயர்ந்திருந்தார்கள். பெருமாள் கோவிலிருந்து நான்காவது வீடு எங்களுடையது, எங்களுடையது என்பதில் அழுத்தம் மிகுதியாகக் கொடுக்கவேண்டும். அப்பாவும், சித்தப்பாவும் சேர்ந்து கூட்டாக கிட்டத்தட்ட நாற்பது வருடங்களுக்கு முன்னே குடிபெயர்ந்து, இன்றும் அங்கே தொடர்கிறார்கள்.
அந்த காலத்திற்கே உண்டான அமைப்புடன் வீடு. வாசலில் வலது புறம் ஒரு சிறிய தின்னை, தொடர்ந்தாற் போலிருந்த ரேழியில் ஒரு பெரிய தின்னை, மிகப்பெரிய ஹால், மித்தம் (முற்றம்), அக்ரஹாரத்தையும் நாகப்பட்டிண ரஸ்தாவையும் இனைக்கும் கொல்லைப்புற வழி, கினறு, மாமரம் என்று அடுக்கிக்கொண்டே போகலாம். வீட்டின் கொல்லையிலிருந்து வாசற்புரம் ஓடி வருவதற்குள் அன்று படித்த பத்தாம் வாய்பாட்டை ஒருமுறை ஒப்புவித்துவிடலாம். ஆனால் சித்தப்பா கொல்லைக்கு வந்தால் போதும் அதில் பாதி நேரம் கூட எடுக்காது, தெருமுனைக்கே போய்விடுவேன்.

விஜயபுரத்து விஜயம் இன்னமும் தொடரும்.

2003-11-20T01:04:00.000-08:00

வலைப்பதிவுகளும் நானும்

இன்று காலை எனது வலைப்பதிவை பார்க்கும் போது ஒரே ஆச்சரியம், நான் எழுதிய பதிவிற்குப் பாராட்டுக்கள்.
உண்மையில் எனது வீட்டிற்க்கு கடிதத்தைத் தவிற வேறு எதையும் நான் எழுதியது கிடையாது (கடிதமும் கல்லூரி நாட்களில் எழுதியது, இப்பொழுது தான் தொலைபேசி இருக்கிறதே).
எதையாவது எழுதுவது என்றாலே எனக்கு உதரலெடுக்க ஆரம்பித்துவிடும், எனது நன்பர்கள் என்னிடமிருந்து எதிர்பார்க்கும் கடைசிப் பொருள் எனது மடலாகத்தானிருக்கும். எனது வலைப்பதிவுகள் பற்றி அவர்களிடத்தில் இன்னமும் சொல்ல வில்லை, சொன்னால் என்ன நடக்கும் என்று தெரியாது.
இந்த விமரிசங்களைப் பார்க்கும் பொழுது, எனக்கு மேலும் எழுத வேண்டும் எனத்தோன்றுகிறது. மனக்குரங்கு(வேதாளத்தை கொஞ்சம் தூங்க விடுகிறேன்) மீண்டும் மரத்தில் ஏறுவதற்கு முன்பு இதைப்பதித்து விடுகிறேன்.
நன்பர்கள் 'காசி'க்கும் 'பரி'க்கும் நன்றி.

2003-11-19T02:57:00.000-08:00

கணக்குப்புலி கந்தசாமி மகன்

வழக்கமாக வலையை மேய்ந்துக் கொண்டிருக்கும் பொழுது இந்த புதிரைப் பார்க்க நேர்ந்தது, புதிருக்கு விடையும் உடனே கிடைத்துவிட்டதால் பதிலெழுத வேண்டும் என்ற ஆர்வம் தோன்றியது. இதோ எனது பதில்.

மு.கு. (அதாங்க முன் குறிப்பு :-) ) :- எனக்கு கதை எழுதத் தெரியாது என்பது எனது மற்ற வலைப்பதிவுகளைப் பார்க்கும் பொழுதே உங்களுக்கு தெரிந்திருக்க வேண்டும், இருந்தாலும் ...... :-). சரி சரி, பயப்பட வேண்டாம் இது ஏதோ ஆர்வக்கோளாரிலே எழுதிவிட்டேன் இனிமேல கொஞ்சம் கவனமா இருக்கிறேன்.

கணக்குப்புலி கந்தசாமி மகனும் பஞ்சாயத்தும்

புதிரைப் படிக்க இங்கே சுட்டவும். http://kasiblogs.blogspot.com/

ஊர் சனம் எல்லாம் (அமாங்க எல்லாரும்), ஆலமரத்தடியில் கூடுவதற்கு அரை மணிநேரமே பிடித்தது. பண்ணையாரே வழக்கு போட்டிருந்ததால் இவ்வளவு ஆர்வம்.

"இப்படி எல்லாரும் உக்காந்திருந்தா எப்படி என்ன வழக்குன்னு விசாரியுங்க", சொன்னது கூட்டதின் முதல் வரிசையில் அமர்ந்திருந்த ஒரு ஊர் பெரிசு. (நன்றி: தமிழ் சினிமா :- ) )

பண்னையார் அந்த பெரிசை ஒரக்கண்ணால் ஒதுக்கிவிட்டு ஆரம்பித்தார், "நான் இந்த கந்தசாமியோட மவனை காலையில மாடு மேய்க்கிறதுக்காக வேலைக்கு வச்சேன். களவானிப்பய பாதி மாட திருடிப்புட்டான்". கோபத்தில் அவரது பேச்சு வழக்கு வெகுவக மாறியிருந்தது.

"எலே முனிசாமி, உங்கப்பன் எவ்வளவு நாணயமான ஆளு ஆனா உம்மேலெ இப்படி ஒரு வழக்கு. நீ என்னலே சொல்லுதே, மாடெல்லாம் நீ தான் திருடினியா?", பஞ்சாயத்து தலைவர் தன்னுடைய பங்கிற்க்கு வழக்கினை சுவாரசியமாக ஆக்கிய புன்னகையோடு மீசையை தடவி விட்டுக்கொண்டார்.

"ஐயா, நான் சாப்பாட்டுக்கு கஸ்டப்படுறவந்தான் ஆனா இவரு சொல்லுறாமாதிரி களவானி இல்லீங்க", பண்ணையாரை "இவரு"ன்னு அழைத்த திருப்தியோடு முனிசாமி மேலும் தொடர்ந்தான்.
"காலயிலெ மாட ஓட்டிட்டு போகும்போது 'வரிசைக்கு நாலா, அஞ்சு வரிசை ஒப்படைக்கணும்'னு சொன்னாருங்க, அது மாதிரியே செஞ்சேனுங்க. இப்போ என்னனா மாடு கொறையுதுன்னு கூவுறாருங்க"

பஞ்சாயத்து தலைவர் முனிசாமியின் முகத்தில் ஓடிய புன்னகையை கவனிக்காமல் இல்லை. முனிசாமிதான் திருடன் என்று மனதிற்குள் தோன்றியது ஆனால் அதனை நிரூபிக்கும் பொறுப்பில் இருந்ததால் மௌனமாக பண்ணையாரை நோக்கினார்.

"நான் அப்படி சொன்னது உன்மை தான், எண்ணி சரிபாக்குறதுக்கு ஏதுவா இருக்குமேன்னு அப்படி சொன்னேன்", பண்ணையார் தன்னுடைய நிலையை நியாயப்படுத்திவிட்டுத் தொடர்ந்தார். "காலையிலே ஓட்டிட்டு போகும்போது மொத்தமா இருவது மாடுங்க இருந்தது, ஆனா மேஞ்சிட்டு கொண்டுவரையிலெ பாதி மாட காணோம். இந்த்தப்பய ஏதோ கில்லாடித்தனம் பன்னிட்டு நான் சொன்னா மாதிரி அஞ்சு வரிசை இருக்குங்கறான்".

"எலே முனிசாமி, எங்கே அந்த்த அஞ்சு வரிசையை எனக்கு காமி", என்றார் பஞ்சாயத்து தலைவர் அந்த அஞ்சு வரிசை அமைப்பை பார்க்கும் ஆர்வத்தில்.

இதனை முன்னமே அறிந்தவன் போல, "மாடெல்லாம் அப்படி ஏற்கனவே மரத்துக்கு அப்பால நிக்கவச்சுட்டேனுங்க".
உண்மைதான், மாடுகள் மரத்திற்கு பின்புறம் நிற்க வைக்கப்பட்டிருந்தன.

பஞ்சாயத்துத் தலைவர் அந்த அமைப்பை ஆழமாக நோட்டமிட்டார். பத்து மாடுகளையே வைத்து முனிசாமி அமைத்திருந்த வரிசைகளைப் பார்த்து அவனது அறிவை மனதளவில் பாராட்டினாலும் அந்த அறிவு குறுக்கு வழியில் செல்வதைப்பார்த்து கவலைப்பட்டார்.

ஒரு முடிவுக்கு வந்தவராக, "எலே முனிசாமி நீ மாடு ஓட்டிட்டு போகும் போது பண்ணையார் என்ன சொன்னார்னு வார்த்தை மாறாம சொல்லு" என்றார்.

"'வரிசைக்கு நாலா, அஞ்சு வரிசை ஒப்படைக்கணும்'னு சொன்னாருங்க"

"நீ இங்க அஞ்சு வரிசையா மாடுங்கள நிக்க வச்சிருக்க, ஆனா அவரு அஞ்சு வரிசைய ஒப்படைக்க தானே சொன்னாரு, சொன்னா மாதிரி அஞ்சு வரிசையையும் ஒவ்வொரு வரிசையா அவரோட தொழுவத்துக்கு அனுப்பு, பண்ணையாரையா நீங்க தொழுவத்துக்கு போகும்பொழுது ஒவ்வொரு வரிசையா எண்ணி சரி பாருங்க"

ஐந்து வரிசையை அனுப்பவேண்டுமெனில் இருபது மாடுகளயும் ஒப்படைக்கவேண்டும், முனிசாமியை இது தனது வழிக்கு கொண்டு வரும் என்ற உறுதியோடு பஞ்சாயத்துத் தலைவர் முனிசாமியைப் பார்த்தார்.
"ஐயா", மெதுவாக ஆரம்பித்தான் முனிசாமி. "என்ன மன்னிச்சுடுங்க. நான் ஒழுங்கா எல்லா மாடுங்களையும் ஒப்படைச்சுடலாமுன்னு தானுங்க இருந்தேன். ஆனா இவரு காலையிலே என்னப்பார்த்து 'போடா போ, நான் பாக்காத கணக்கா.. 'ன்னு பேசினாருங்க. அதான அவருக்கு சவாலா இருக்கனும்னு இப்படி செஞ்சேன்."
"சத்தியமா மாட திருடனும்கிற என்னமில்லீங்க. பத்து மாட முன்னமே தொளுவத்திலே அடைச்சிட்டேனுங்க மீதி பத்து மாடுதான் மரத்துக்கு பின்னால இருக்கறதுங்க".

பஞ்சாயத்துத் தலைவர் இப்பொழுது தன்னையே மனதிற்குள் கடிந்து கொண்டார். 'புலிக்குப் பிறந்தது பூனையாகுமா?', கந்தசாமியின் மகனா கொக்கா. என்று நினைத்துக்கொண்டே பண்ணையாரை நோக்கினார்.

அதுவரை கோபமாக நின்றிருந்த பண்ணையாருக்கு காலையில் நிகழ்ந்த உரையாடல் மனதில் தோன்றி மறைந்தது. அவர் முகத்திலிருந்த கோபம் போய் தெளிவு தெரிந்தது.
"நான் வழக்கை திரும்ப வாங்கிக்கறேன், என்னோட கணக்குப்பிள்ளை மேலெ எனக்கு நம்பிக்கை வந்திருச்சு" என்றார் புண்ணகையோடு.

பஞ்சாயத்துத் தலைவரும் புன்னகை பூத்தவராக பஞ்சாயத்தை முடித்துக் கொண்டார்.

"என்ன பஞ்சாயத்துடா இது, ஒரு ருசுவே இல்லெ", முன்வரிசையில் உட்கார்ந்திருந்த ஊர் பெரிசுக்கு நடந்தவை ஒன்றும் புரியவில்லை.

2003-10-31T01:53:00.000-08:00

சிற்றலை
http://www.tamillinux.org/~venkat/myblog/archives/000086.html
கட்டுரையைப் படிக்கும் பொழுதே என்னுடைய சிற்றலை நாட்கள் கண்முன்னே வந்து நின்றன. அவை அருமையான அனுபவங்கள், சிறிய வயதில் தினமும் எனக்கு அலாரமாக பயன்பட்ட காலை 6 மணி செய்தியில் ஆரம்பித்து பின்பு படிப்படியாக பிபிசியின் சிற்றலை ஒலிபரப்புக்கு தாவிய எனது வானொலி ஆர்வம் இன்றும் தொடர்கிறது. இப்பொழுதும் தமிழோசையை கேட்கும் ஆர்வம் போகவில்லை, அனால் ஊடகம் தான் வானொலியிருந்து வலையாக மாறிவிட்டது. http://www.bbc.co.uk/tamil/index.shtml.

அந்நாட்களில் சிற்றலை கூடவே வீட்டில் வேறொரு கொந்தளிப்பு அலையும் வீசும். சிற்றலையினால் வானொலியில் எனக்கேற்பட்ட ஈடுபாடு பின்னர் வானொலிக்கு அறுவை சிகிச்சை செய்யும் அளவினை எட்டியது, வானொலியிலிருந்து வரும் ஓசையின் மூலத்தை அறிய நான் மேற்கொண்ட முயற்சியில் ஆறு வானொலிப் பெட்டிகள் பலியானது தான் கொந்தளிப்பிற்கு காரணம். பின்னர் அதுவே எனது மின்னணுவியலின் மீதான அதீத ஆர்வத்திற்கு விதையானது. பனிரெண்டு வயதில் ஐசி, ரெஸிச்டர் போன்றவை என்னவென்றே தெரியாமலிருந்த பொழுதே சிப்-சாப் (chip-chap) என்ற மின்னனு செய்முறை தொகுப்பினை (எலெக்டிரானிக் கிட்) அடம்பிடித்து வாங்கினேன். chip-chap, 555 ஐசியை அடிப்படையாகக் கொண்டது மேலும் அது நூற்றுக்கனக்கான மின்சுற்று படங்களையும் அதற்கான விளக்கங்களையும் உள்ளடக்கியது.

வாங்கிய பின் முதல் மூன்று நான்கு மாதங்கள் அது ஏதோ வேற்று கிரகத்திலிருந்து வந்து விழுந்த பண்டம் போல இருந்தது, அதனை கையால் தொடவே பயம். என்னவென்றே தெரியாமலிருந்தாலும், அதை வாங்கியதை நியாயப்படுத்த வேண்டியிருந்ததால் மின்சுற்றுக்களை சற்றே பயத்துடனும், மிக குழப்பத்துடனும் பார்க்கத் தொடங்கினேன். முதல் மின்சுற்றை நிறுவி முடிக்க இரண்டு மாதங்களாயின, அது ஒரு தாள ஒலியெழுப்பி (metronome). முதல் வெற்றியில் கண்ட ஆனந்ததிற்கு அளவே இல்லை, அந்த மின்சுற்றை பிரிக்காமல் வைத்திருந்து வீட்டிற்க்கு யார் வந்தாலும் செய்முறை விளக்கம் அளித்து அவர்களை ஓட வைத்துக் கொண்டிருந்தேன். பின்னர் ஒவ்வொன்றாக அனைத்து மமின்சுற்றுக்களையும் அடுத்த சில மாதங்களிலேயே நிறுவி முடித்துவிட்டேன். இந்த ஆர்வம் என்னை "எலக்டிரானிக்ஸ் ஃபார் யூ" இதழின் வாசகனாக ஆக்கியது. ஒன்பதாவது படிக்கும் பொழுது "ஆனந்த விகடன்", "கல்கி"யை அடுத்து "எலக்டிரானிக்ஸ் ஃபார் யூ"வையும் படி(பார்)க்க ஆரம்பித்தேன். அந்த ஆர்வக்கோளாரே நான் மின்னணுவியல் பொறியாளரானதற்க்கான காரணம். (பின்னர் கணிணி மென்பொருள் மீதான ஆர்வம் ஏற்பட்டதும், மென்பொருள் பொறியாளராக தற்பொழுது பனியாற்றிக் கொண்டிருப்பதும் வேறு கதை).

2003-10-20T22:43:00.000-07:00

டிரான் - ஸிம்பியன்

வெகு சமீபத்தில் ராய்டர் செய்தி நிறுவனம் TRON இயங்(க்)குதளம் பற்றிய செய்தியை வெளியிட்டது. அதில் "சகமுரா"வையும் (TRONஐ உருவாக்கியவர்) பில் கேட்ஸையும் ஒப்பிட்டு வந்த செய்தி சுவாரஸியமானது.சில மேற்கோள்கள்

"In the world of computers, the obscure Japanese engineer stands in the top rank along with Gates, having developed an operating system that is more widely used than even Microsoft Corp's Windows."

"Had Sakamura decided to charge even one cent to each user of TRON, he would easily be a dollar billionaire by now, possibly even rivalling Gates...."

முழு கட்டுரையை காண இங்கே சுட்டவும்.
http://www.bizreport.com/article.php?art_id=4656

லினக்ஸ், டிரான் பற்றி பேசும்பொழுது ஸிம்பியன் இயங்(க்)குதளம் பற்றி குறிப்பிடாமல் இருந்தால் தவறு. இன்று கைத்தொலைபேசிகளை இயக்கிக்கொண்டிருக்கும் தளமாகும் ஸிம்பியன். நோக்கியாவின் கண்டுபிடிப்பாயினும் ஸிம்பியன் பல்வேறு கைத்தொலைபேசி நிறுவனங்களின் ஆதரவைப்பெற்றுள்ளது.

http://www.symbian.com
http://www.allaboutsymbian.com/

மைக்ரோசாஃப்ட் நிறுவனம் தற்பொழுது தான் விட்ட இடங்களை நிரப்பும் முயற்சியில் இறங்கியுள்ளது.
http://www.forbes.com/2003/09/15/cx_ah_0915motmsft.html

டிரான் பற்றிய மற்றுமொரு குறிப்பு
http://www.tamillinux.org/~venkat/myblog/archives/000078.html#more

2003-10-15T07:31:00.000-07:00

வலைக்குறிப்பு - வலைப்பதிவு - வலைப்பூ

திரு. வெங்கட் அவர்களின் "வலைக்குறிப்பில்" இன்று நான் கண்டது. weblog கிற்கு பெயர் சூட்டுவதில் வென்கட் "வலைக்குறிப்பு" என்ற வார்த்தை மிகவும் பொருத்தமானது என்கிறார். என் பார்வையில் "வலைப்பதிவு" என்பதே சரி என்றுப்பட்டது (பார்க்க comments). அவர் சொல்லுவது போல பதிவு என்பது Register என்றும் கூட அர்த்தமாகும்.
நான் எனது weblogகிற்கு வலைப்பதிவுகள் என்றே பெயரிட்டேன், ஆனால் இப்பொழுது அதனை வலை மொட்டுக்கள் என்று பெயர் மாற்றம் செய்துள்ளேன். தற்பொழுது இப்பெயர் என் பக்கங்களுக்குப்(கவனிக்க என் பக்கங்களுக்கு மட்டும்...weblogs என்ற சொல்லுக்கல்ல) பொருத்தமானது. இப்பெயர் சிரிதே கவைத்துவமக்கவும் உள்ளது எனக்கு என் பக்கங்களின் தன்மையை குறிப்பிடும் (ie., mine is still a startup) படியாகவும் உள்ளது.

2003-10-13T06:22:00.000-07:00

பெயர் மாற்றம்

எனது வலையகத்தின் பெயரை "வலை மொட்டுக்கள்" என்று பெயர் மாற்றம் செய்துள்ளேன். திசைகள் வலையிதழ் "weblogs"ஐ வலைப்பூக்கள் என்று குறிப்பிடுகிறது. திசைகள் இதழில் வரும் வலைப்பூக்களை கண்ட பிறகு எனது "weblog"கிற்கு வலைமொட்டுக்கள் என்பதே சரியான பெயர் என்று தோன்றுகிறது.வெகு விரைவில் மொட்டுக்கள் மலரும் நேரம் வரும் என்று எதிர்பார்க்கிறேன்.

2003-10-13T06:10:00.000-07:00

சி-டாக்கின் இந்திய மொழி மென்பொருள்

சமீபத்தில் சி-டாக்கின் இந்திய மொழிகளுக்கான மென்பொருள் iLEAPஐ எனது கணிணியில் நிறுவ நேர்ந்தது. இம்மென்பொருள் விண்டோஸின் WORDஐ ஒத்தது. மிக நேர்த்தியான புற அமைப்புடன் வெளிவந்திருக்கும் இந்த மென்பொருளை அனைத்து இந்திய மொழிகளிளும் உபயோகிக்கலாம் என்பதால் இதற்க்கான வரவேற்ப்பு கூடுகின்றது. மேலும் இது சொற்களை பல்வேறு மொழிகளுக்கு மொழி மாற்றம் செய்யவல்லது (கவனிக்க மொழிமாற்றம் - Transliteration, மொழியாக்கம் அல்ல).
iLEAPல் எனக்கு உபயோகமாகப்பட்ட ஒரு சில அம்சங்கள்:

MS Word போன்ற அமைப்பு
மொழி மாற்றம்
பன்மொழி உச்சரிப்பு சரிபார்த்தல் (spell check - ஒவ்வொரு மொழிக்கும் ஒரு அகராதியை நாமே உருவாக்கிக்கொள்ளலாம்)

இம்மென்பொருளை http://www.cdacindia.com/html/gist/products/ileap.asp என்ற வலையகத்திலிருந்து பதிவிறக்கம் செய்யலாம்.

2003-10-09T06:26:00.000-07:00

கூகிளின் தமிழ் சேவை

கூகிளின் தமிழ் சேவை அனைவரும் அறிந்ததே. இச்சேவை கூகிள் மொழிபெயர்ப்பாளர்களின் உதவியோடு செய்யப்படுகிறது. யார் வேண்டுமானாலும் மொழிபெயர்ப்பளராக கூகிளில் பதிவு செய்துகொள்ளலாம். இம்முறை நன்றாக செயல்பட்டாலும் இது சில பக்கவிளைவுகளுக்கு இடம் கொடுக்கின்றது. கூகிளுக்கு மொழிபெயர்ப்பாளராக பணியாற்றுபவர்களுக்கான வழிமுறைகள் சரியாக நிறுவப்படவில்லை, இது பல சமயங்களில் குழப்பதையே உண்டாக்குகிறது. முக்கியமாக இது கூகிளின் தமிழ் சேவையை பாதிக்கின்றது.

எடுத்துக்காட்டாக நான் கூகிளுக்காக பல சொற்றொடர்களை யூனிகோட் தமிழில் மொழிபெயர்த்தேன். சில நாட்களுக்குப் பிறகு அச்சொற்றொடர்களை வேறொரு மொழிபெயர்ப்பாளர் TSCII/TAB உருக்கட்டிற்கேற்றவாறு மாற்றங்களை செய்துள்ளார். என்னைப்பொருத்தவரையில் இனிவரும் இனையப்பக்கங்கள் யூனிகோட் தமிழிலேயே வடிவமைக்கப்படவேண்டும். TSCII/TAB போன்ற உருக்கட்டில் இனையப்பக்கங்களை வடிவமைப்பதன் மூலம் அப்பக்கங்கள் எல்லோரையும் அடைவதை தடைசெய்கின்றோம்.

யூனிகோட் தமிழில் இனையபக்கங்களை வடிவமைப்பதன் மூலம் நாம் பல்வேறு நலன்களைப்பெறுவோம்:

TSCII/TAB பொன்ற உருக்கட்டுகளை நிறுவத்தேவையில்லை, தமிழ் பக்கங்களை எந்தவொரு சிரமமும் இல்லாமல் பார்க்கலாம்.
பண்மொழிப்பக்கங்களை சரியான முறையில் வடிவமைக்கலாம்
கூகிள் போன்ற தேடல்களில் தமிழ் சொற்க்களையே பயன்படுத்தலாம்
மேலும் பல...

அனைவரும் யூனிகோடிற்கு மாறுவார்களா?

2003-10-09T05:32:00.000-07:00

எங்கோ எப்பொழுதோ படித்தது : ஆச்சரியமூட்டும் செய்யுள்

முக்கோணத்தின் கர்ணத்தை(Hypotenuse) கண்டறிய உதவும் தமிழ் செய்யுள்

ஓடிய நீளந்தன்னை ஓரெட்டு கூறதாக்கி கூற்றிலே ஒன்று தள்ளி
குன்றத்தில் பாதி சேர்த்தால் வருவது கர்ணம் தானே

இச்செய்யுளின் விளக்கத்தை இங்கு காணலாம். பல வருடங்களுக்கு முன்பு எங்கோ படித்தது (என் ஞாபக சக்திக்கு ஒரு பலே :-) ).

(செய்யுள் என்று எழுதிவிட்டேன், உன்மையில் அது என்ன என்பதை யாராவது சொன்னால் நன்றாக இருக்கும்.)

2003-10-07T07:54:00.000-07:00

புள்ளி ராஜாவுக்கு எய்ட்ஸ் வருமா?

இக்கணம் தமிழ்நாட்டிலுள்ள எவரேனையும் பார்த்து சிதம்பர ரகசியத்துக்குப் பிறகு பெரிய புதிர் என்னவென்று கேட்டால் உடனே "புள்ளி ராஜாவுக்கு எய்ட்ஸ் வருமா?" என்ற கேள்வி தான் பதிலாக வரும். இக்கேள்வி எவ்வளவு பிரபலமானது என்று கண்டறிய கூகிளில் "Pulli Raja" என்ற சொற்றொடரை தேடவும் (நான் தேடிய பொழுது 763 இனைப்புகள் கிடைத்தன).
அது சரி புள்ளி ராஜாவையும் சிதம்பர ரகசியத்தையும் ஏன் முடிந்தேன் என்கிறீர்களா? சிதம்பர ரகசியம் என்றால் "வெற்றுத் தன்மையின் விளக்கம்" என்கிறது இத்தளம். சிதம்பர ரகசியத்தை கண்டறிய முற்ப்பட்டவர்கள் பலர் அது என்ன என்பதை அறியும் வரை அதற்கு முழு முக்கியத்துவம் கொடுத்து பிரபலமாக்கினார்கள் (இப்பொழுதும் யாரேனும் அவ்வாறிருக்கிறார்களா?). ஆனால் அது என்னவென்று தெரிந்ததும் எவ்வளவு முக்கியத்துவம் கொடுத்தார்களோ அவ்வளவு சீக்கிரம் சுவாரஸியம் அற்றுப் போனார்கள்.
இதே போன்று புள்ளி ராஜா பற்றி எழுந்துள்ள சர்சைகளும் ஆகிவிடும் என்றே தோன்றுகிறது. புள்ளி ராஜாவின் மூதாதையர்களே இதற்க்கு சான்று (பார்க்க புள்ளி ராஜாவும் திகேன் வர்மாவும்).
ஆனால் மிகக்குறுகிய காலத்தில் பிரபலமானவர்கள் வரிசையில் புள்ளி ராஜா முதலிடத்தைப் நெருங்கிவிட்டான் என்பதை மறுக்க முடியாது.

2003-10-06T08:19:00.000-07:00

சாம தான பேத தண்டம்

எந்த ஒரு விஷயத்தையும் சாதிக்கவேண்டுமெனில் மேற்கொண்ட வழிகளில் முயற்சி செய்யலாம் என்று எவர் சொன்னாரோ
அவர் வாயில் வெல்லத்தை தான் இடவேண்டும்.நான் என்னுடைய வலைப்பதிவுகளுக்கான வலைத்தளங்களை தேடும்பொழுது
மேற்கண்ட சொற்றொடர் மிகவும் பொருத்தமாகப் பட்டது. முதலில் "சாம" அதாவது பொருமையுடன் தேடலை துவங்கிய நான்
சிறிது நேரத்தில் என் மனதிற்குகந்த வலைத்தளப்பெயர் கிடைக்காமற் போனதும், "தான" முறையை கையாள முற்பட்டேன் அதிலும்
தோல்வி. எனக்கு முன்னரே சந்தா கட்டி நான் தேடிய வளைத்தளங்களை தனதாக்கிக் கொண்டவர்களைத் தான் வளையில் சந்திக்க நேர்ந்தது.
நிறைய முயற்சிகட்குப் பிறகு இப்பெயரை தேர்ந்தெடுத்தேன் (அம்முயற்சிகளில் பேதம் comparison ஒரு முக்கிய பங்கானது).

அதுசரி மூன்று வழிகள்தானே ஆயிற்று என்கிறீர்களா? இத்தளத்தின் பெயர்க்காரணத்தை என்னிடம் வந்து கேட்பவர்களிடம் நாலாவது
முறையை கையாளலாம் என்றிருக்கிறேன் :-).